VP Sara may dollar accounts - prosecution

MANILA, Philippines — Ibinunyag ng House prosecution nitong Huwebes ang pagkakatuklas sa mga dollar account na pag-aari umano ni Vice President Sara Duterte matapos magdesisyon ang kanyang kampo na hindi na iharap ang isang opisyal ng Bank of the Philippine Islands (BPI) na maaari sanang tanungin tungkol sa mga naturang account.

Ayon kay private prosecutor James Bryan Ibrahim Alih, kabilang sa mga dokumentong isinumite ng BPI ang isang liham na nagpapatunay na may mga dollar account si Duterte. Hindi umano ito natukoy noon dahil hindi kasama sa naunang subpoena ang mga dollar account.

“Gusto lamang naming bigyang-pansin ang ilang bahagi ng mga dokumento, partikular ang liham mula sa BPI na nagpapatunay na may mga dollar account ang Bise Presidente,” pahayag ni Alih sa Senado na nagsisilbing impeachment court.

Lumabas ang usapin matapos ipaalam ni defense counsel Michael Poa sa korte na hindi na nila ihaharap bilang testigo si BPI Senior Vice President Paul Roderick Ysmael.

Paliwanag ni Poa, dapat sana ay patotohanan ni Ysmael ang isang liham na ipinadala niya sa bangko. Ngunit dahil inamin na niya sa nakaraang pagdinig na siya ang sumulat nito, nagpasya ang depensa na hindi na ituloy ang kanyang pagharap upang makatipid sa oras.

Gayunman, sinabi ni Alih na nais sanang tanungin ng prosecution si Ysmael tungkol sa mga karagdagang dokumentong isinumite ng BPI, lalo na ang liham na tumutukoy sa mga dollar account ni Duterte.

Hindi naman pinayagan ni Senate President at Presiding Officer Sen. Francis “Chiz” Escudero na talakayin ang mga dokumento sa naturang pagdinig dahil hindi pa ito pormal na naipiprisinta at natutukoy sa korte sa pamamagitan ng isang testigo.

Posibleng maging panibagong usapin sa impeachment trial ang mga natuklasang dollar account, partikular kung kumpleto at tama ang naging deklarasyon ni Duterte sa kanyang mga deposito sa bangko at iba pang ari-arian sa Statements of Assets, Liabilities and Net Worth (SALNs).

Sa ngayon, hindi pa natutukoy sa korte ang halaga ng laman at mga transaksiyong dumaan sa mga bagong natuklasang dollar account.