Ang kabuntagon ni Odilao

Giingon nga kining atong kahimtang ning kalibutan, is a matter of attitude. Kon sa imong hunahuna, wa'ay hinungdan ug puno sa kagul-anan ug kapakyasan ang kinabuhi, mao kini ang mahitabo.

Kon inigmata nato sa buntag, magmuro kita ug maguol, mao kini ang mahitabo sa tibuok adlaw. Sa ato pa, kita da ang magbuot kon unsa ang atong adlaw. Sigun sa atong attitude the whole day, ug agad kon unsa ang atong buntag.

Mi-text kanato si Boy Odilao, ang amahan sa Sinulog ug Bahugbahug sa Mactan, kinsa usahay hikalimtan lang, Matud niya:

"Sugata ang kabuntagon sa usa ka maanindot nga pahiyum, ug gaksa ang bag-ong pagsidlak sa adlaw uban sa mga saad sa matahom nga paghanduraw.."

Nindot, di ba? Mao ni ang matag buntag ni Boy Odilao, mag-uwan o mag-init. Maoy hinungdan nga ang iyang tibuok adlaw masanagon ug masaaron, taliwa'a sa daghang mga suliran nga naghambin sa atong nasud.

Maoy hinungdan nga despite sa iyang pag-retire gikan sa public service, diin sa iyang panahon diha sa adwana, wa'a gyuy smuggling, ug wa'ay mga palusot, wa'ay container nga ma-wa'a.

Karon, uban sa daghan niyang mga responsibilidad nga wa'a niya pangayoa, apan gidawat, gipili siyang presidente sa bag-ong natukod nga pundok sa mga kanhi regional heads sa mga nasudnong buhatan dinhi sa atong region.

Mipapanumpa sa mga sakop ug opisyales sa AFRENA 7 kon Association of Former Regional Executives of National Agencies, Region 7, mao si Gobernador Gwen F. Garcia. Nanumpa sila si Boy Odilao, presidente; Greg Bacolod, 1st VP; Rene Morales, 2nd VP; Manny Iway, Finance Officer; Ted Segura, Auditor, Antolin de la Serna, secretary; ug mga director sila si Cris Rocamora, Boy Oppus, ug Joe Gapas.

Nanumpa usab ang mga sakop nga nanambong, sila si Ben Divinagracia, Rod Rojas, Abe Lucero, Elena Diola, Sol Baclayon, Flor Villarin.

Alang sa AFRENA 7, masanagon ang matag buntag. Masaaron ang matag adlaw. Matud pa ni Odilao, the only difference between a bad day and a good day is your ATTITUDE.

So, sugata kanunay ang bag-ong adlaw sa labing maanindot nimong pahiyum, and you'll have a good day the whole day. Salamat Boy sa imong text.