Imbitahon nakos Bush sa balay aron ma-aspalto sad among dalan

Gumikan sa umaabot nga ASEAN meet guwapo na kaayo ang atong kadalanan dinhi sa dakbayan, at least ang mga major thoroughfares. Magpasalamat ta sa mga tawo kinsa maoy responsable pag-hold sa maong meet dinhi sa atong dapit.

Kay kon dili pa tungod sa maong meet, kutob ra gyud tas tapak-tapak sa mga potholes nga kon mauwanan, mangapakpak lang pod dayon. Ug kon di maukal, makadugang sa problema tungod kay mag-untol-untol pod ang mga sakyanan.

Anyway, suwayan nakog contact ang mga organizer niini, kay akong imbitahon si Presidente Bush ug iyang entourage nga ari sa amo mo-snacks inig-abut gyud nila, ug dayon nilang pauli ngadto sa Amerika.

Ang akong tuyo, dili aron nga makakita kong Bush, maka-shake hands, makapicture taking uban niya, ug ma-televised ang among pag-shake hands, i-feed dayon ngadto sa CNN, kondili, aron lang gyud aspaltohon sad ni Tomas ang maong dalan diri. Period.

Ug bahin sa iyang entourage, mga duha o upat ra tingali ang kauban ni Bush. Sa ato pa, di kinahanglan nga mangandam kog bongga kaayo nga snacks.

Lahi natong mga Pinoy, nga kon ang ato na ganing presidente ang moduaw sa ubang kanasuran, gamay ra ang 50 ka tawo ang mo-composed sa entourage. Nagpasabot nga mas daghan tag kwarta kay sa Amerika.

Unya, inigpamauli ra ba nila nganhi, wa'a gyud tay madungog kon unsay mga benepisyo nga ilang ikahatag nganhi kanato nga maoy naggasto sa ilang official travel abroad.

Nag-unsa lang kaha sila didto no, Dro?

Unya, tungod kay pila ra man sila ka tawo nga pakan-on, di kinahanglan mag-solicit kog tabang gikan sa mga datu nga Insek, aron i-accommodate nila. Makaafford sad tingali ko.

Tapus sa maong meet, mangimbitar pa tag daghang international meets, aron mahurot gyug ka aspalto ang atong kadalanan, apil na diri sa amo. Komentaryo? Text 0916-6488650.