Gahom sa mas daghan
Natukmaan nako ang mga nanimba nga nagbaha pagpanggawas gikan sa San Narciso Parish sa Consolacion sa unang adlaw sa Misa de Gallo karong tuiga. Gawas nga nabantang nga bisan ning edad sa internet nagpabiling gamhanan ang tradisyon ug saad sa grasya kon makatambong sa tanang siyam ka misa dayong Pasko naklaro nako nga utro sang gamhanan, apan subo nga hangtod karon wa pang kaamgo sa ilang puwersa, ang kasarangang mga molupyo.
Duha ang akong nakita nga mga timaan sa talagsaon nilang puwersa: Una, namungingi sa mga pasahero ang PUJs bisan kadlawon pang dako; ug ikaduha, nahurot ang mga baligya nga painit sa duha ka daplin sa nasudnong highway.
***
Paglugsong pa lang nako gikan sa among pinuy-anan sa bungtod paingon sa highway, nakasugat na ko sa among mga silingan nga mapahiyumong nagbaktas nga nagbitbit sa ilang mga bangkito. Maong wa na ko mahibung pagkakita sa kabaga sa mga pasahero nga natanggong kay pulos puno ang PUJs gikan sa Liloan paingon sa Mandaue.
Pila kahay dugang kita sa mga drayber tungod sa mas daghang pasahero? Di lang sa Consolacion kon dili sa ubang kalungsoran ug mga dakbayan nga may mga simbahan nga nagpahigayon sa mga misa sa kadlawon? Mahimong di na hinuon sama kadaghan sa mosunod nga mga adlaw, apan ang umaabot nga walo ka adlaw nagsaad og dugang pinaskohan.
***
Tam-is sab og pahiyom ang akong suki nga tindera og puto ug sikwate. Sa kasarangang mga adlaw maabtan og pasado alas-7 sa buntag una mahurot ang iyang baligya, may mga adlaw gani nga di mahurot apan mamutos na lang kay mangabli nang mga tindahan nga ilang gitabonan. Mas paspas hinuong halin kon weekend.
Apan mora lang nikilab ang iyang puto ug sikwate wa pay alas-6 gahapon sa buntag. Wa siya mag-inusara. Nabasiyo sang ubang namaligya og painit. Bisan ang bakeries nga nalabyan sa mga nanimba nahutdan sa ilang pandesal. Pulos nanaad nga mag-andam og mas daghan sa mosunod nga mga Misa de Gallo.
***
Ang mga talan-awon gahapon kabahin lang sa abundang mga pahinumdom nga ang kinabag-an sa katawhan mao kitang mga kabos ug kasarangang mga molupyo. Apan ang atong nakita mao rang tumoy sa atong ilong--ang atong kagamay, nga bisan unsaon og tiyabaw di paminawon, ug kakabos, nga batakan rang mga panginahanglan ang matagbaw sa gamayng kita.
Atong nataligam-an ang kadako sa atong gahom kon magkahiusa. Makapalambo sa gagmay ug ligdong nga mga negosyo ug makapapukan bisan sa higante apan mapahimuslanong mga industriya. Ug kon, inay mag-iyahay ug mag-unay, maghiusa pagtingog ug paglihok way puwersang makabalibad sa atong gipangandoy nga makiangayong kausaban. Napakita ni nato sa nangaging mga Misa de Gallo, hinaot mapasundayag sab sa ubang mapuslanong mga kawsa.
- Latest
