Pangwarta ra’y gihunahuna

Awhagon nako ang mga opisyal diha sa dakbayan sa Mandaue ilabi na ni Mayor Jonas Cortes  nga iya unta nga tan-awon ang grabeng pagpahimulos sa higayon sa tagdumala anang St. James Amusement Park nga anaa sa North Reclamation Area.

Magnegosyo gani kamo, makamao kamo nga mohatag og serbisyo dili kay pulos pangwarta lang ang masulod sa inyong utok! Sigurado ko nga daghan ang gusto nga moreklamo apan miluom lang.

Una, tag P75 ang entrance fee sa matag tawo, apil ang bata nga molapas na sa ilang sukod nga 48 inches. Ang P75 para lang nga makasulod ka sa gitawag nila og park nga maayo ra ba og nindot sa sulod nga wala ra ba g’yuy ayo.

Kon mosakay ka sa pipila ra nila ka “rides” laing bayad, maayo ra ba’g barato nga mahal man ‘sab. Wala gihapon ko moreklamo sa kamahal sa ilang bayranan kon mosakay ka sa ilang mga kalingawan.  

Ang wala nako magustohi mao ang pagpabayad nila og tag P5 sa matag tawo nga mogamit sa ilang comfort rooms nga gamay ra ba kaayo. Tinuod, gamay ra kaayo ang P5 nga makabayad bisan ang sama nako nga pobre, apan dili kini maoy tukma.

Hain na man diay ang ilang serbisyo sa mga tawo nga mibayad og P75 nga entrance fees sa pagsulod sa gitawag nila og park? Gireklamo nako kini didto sa ilang courtesy booth ug gipangita ang ilang kunohay manager apan wala g’yud mopakita.

Awhagon nako si Mayor Cortes nga ipasusi sa imong mga sakop kining binuang sa tagdumala nianang maong amusement park kay pulos lang pangwarta ang nasulod sa ilang mga utok, wala na ang pag-alagad sa ilang mga kliyente.

Bisan si Cebu City election officer Marchel Sarno, kay nagkita man mi nga misuroy ‘sab didto, nakahatag usab og susama nga sentimento apan kay kaihion na tingali, bayad na lang og P5.

Kon dili nila usbon ang ilang pamaagi, mas maayo pa nga dili anhaon sa katawhan kanang maong kunohay park kay dili man g’yud ‘sab makalingaw. Patugatuga’g operate og kalingawan nga dili makamao moserbisyo human mangolekta’g dagko nga entrance fees.

* * *

Kon gusto g’yud si Mayor Mike Rama nga makahimo’g dugang proyekto nga walay labot sa gihan-ay niya diha sa 2013 Annual Budget, mas labing maayo nga iyang i-terminate ang P165 milyones nga gi-time deposit diha sa banko.

Bahala na og dili dako ang interest nga makuha sa dakbayan kay taas na kaayo ang lima ka tuig usa ka makuha ang maong salapi. Sayonan ka nga unya pa kuno sa 2015 mo-mature ug ma-withdraw sa dakbayan ang maong kwarta?

Ang P165 milyones nga gi-time deposit kon gamiton pagmugna og proyekto kapahimuslan dayon sa katawhan. Mag-unsa man kon mokita ang dakbayan og mga tunga sa milyon ka pesos nga interest apan gipundo pa nato ang kwarta.

Aw hinoon, isip mayor anaa ra ni Mike ang paghukom. Unya, unsa na ‘sab kaha ang gihimo sa atong mga abogado sa dakbayan aron makubra ang P124 milyones nga deposito diha sa Postal Bank nga gi-hold sa banko.

Angay nga ikiha sa dakbayan ang kadagkoan sa maong banko tungod kay wala niini tumana ang status quo order nga giisyu sa Court of Appeals. Samtang ang Regional Trial Court dunay Notice of Garnishment sa maong kwarta tungod sa awhag sa kabanayan ni Fr. Vicente Rallos, gimando sa Court of Appeals nga dili usa ipatuman ang maong coourt order.