30 percent ng PUVs walang prangkisa-DILG
Kampanya vs kolorum
MANILA, Philippines — Umaabot sa 30 porsiyento ng mga public utility vehicles ang walang prangkisa sa buong bansa.
Ito ang lumitaw sa ginanap na DILG-DOTr-MMDA Joint Task Force Operation Memorandum of Agreement sa Camp Crame kahapon kaugnay ng paghuli sa mga kolorum na PUVs.
Ayon kay Department of Interior and Local Government (DILG) Secretary Benhur Abalos, iisa ang layunin ng mga ahensiya ng pamahalaan, ito ay upang sugpuin ang masikip na daloy ng trapiko.
Ani Abalos, kailangan na may panuntunan ang mga LGUs sa pagpapatupad ng batas kani-kanilang nasasakupan.
Tiniyak naman ni Department of Transportation (DOTR)Secretary Jaime Bautista na target din nila sa kanilang isasagawang kampanya ang mga transport group na hindi magco-consolidate hanggang sa pagtatapos ng deadline sa April 30. Maituturing na umanong mga kolorum ang mga hindi nagpa-consolidate.
“Pag’di renew considered colorum kasama sila sa huhulihin,“ ani Bautista.
Sinabi naman ni Metropolitan Manila Development Authority (MMDA) Chairman Atty. Romando Artes na tukoy nila ang mga ruta ng mga tsuper na hindi nag-consolidate kaya hindi makakaligtas ang mga kolorum sa lansangan.
Napag-alaman naman kay PNP Chief, Gen. Rommel Francisco Marbil na gagamitin nila ang Integrity Monitoring and Enforcement Group (IMEG) para hulihin ang mga pulis na makikipagsabwatan sa mga may-ari ng colorum na sasakyan at mga driver nito.
- Latest
