Desperadang depensa
Malilian nang daan sa pinangutan-an sa depensa sa mga testigo sa prosekusyon, apil nang taga Anti-Money Laundering Council, mga bangko ug insurance companies, unsay panagang ni Bise Presidente Sara Duterte sa binilyon ka pesos nga mga transaksiyon sa iyang bank accounts uban nilang kanhi Presidente Rodrigo Duterte ug Atty. Mans Carpio: Nga wala siyay labot sa mga transaksiyon, nga wala pahibaw-a sa iyang amahan ug bana sa gisudlan nilang mga transaksiyon, labaw nang wala pananghiri, maong angayng sabton nganong wala madeklarar sa iyang statements of assets, liabilities and net worth.
* * *
Nakapait sa depensa nga ilang nahunahunaan mao nga mora og gitagak ang iyang amahan ug bana. Sama ra nga iya silang gipasanginlan nga nagpatuyang ug nagbuot-buot lang sa gisudlan nga mga transaksiyon sa walay pagkonsulta niya.
Tingali mao na lay nahibilin nilang depensa. Gawas pa, si VP Sara ra ang sinumbong sa impeachment trial. Dili masilotan sa senator judges ang iyang amahan ug bana. Ang importante nga ma-absuwelto siya. Aron magpabilin sa ikaduhang labing taas nga katungdanan sa nasudnong gobyerno ug mahinayon sa pagdagan sa pagka presidente sa 2028.
* * *
Pero unsa man ang mahunahunaan sa lunod patay nga mga dumadapig sa iyang amahan? Nga gituohan nga mas daghan kay sa nibilib niya? Makasabot ba sila nga kinahanglan nga isakripisyo aron dili mahagsa ang ilang dinastiya? Dili ba peligrong masuko na hinuon sila ni VP Sara? Kay natanggong nang daan ang iyang amahan sa prisohan sa The Hague iya pa gyong gitiwasan sa pagtulisok nga maoy tinuod nga utok sa makalilisang ug kuwestiyonableng mga transaksiyon?
* * *
Labaw sa tanan, dili katuohan ang depensa. Kay si VP Sara nipirma sa mga dokumento sa pag-abli sa tanang joint bank accounts nga nabisto sa impeachment trial. Dili kapanghunaw ug dili kapanghimakak sa pagpanag-iya sa bank accounts.
Ug kon tarung nga opisyal sa gobiyerno, iyang responsibilidad ang pagpangutana sa iyang amahan ug sa bana unsay nahitabo sa ilang joint bank accounts–pila na ka milyon ang nadugang o na-iban, unsay bag-ong investments ug insurance policies nga gipundohan, ug diin gikan ug diin padulong ang mga kuwarta nga nagbaha–sa wala pa mohimo og bisan unsang deklarasyon sa iyang SALNs.
- Latest
