Kapin P3M shabu, armas nasakmit

CEBU, Philippines — Tulo ka managlahing buy-bust operation nga gipahigayon sa PNP Drug Enforcement Group–Southern Office Unit 7 (PNP DEG SOU7) sa Cebu City ug Bohol miresulta sa pagkasikop sa duha ka suspek ug pagkasakmit sa kapin 480 gramos nga gituohang shabu nga adunay kinatibuk-ang gibanabanang kantidad nga mokabat sa kapin P3 milyones.

Sa Cebu City, nasikop ang 22-anyos nga habal-habal driver nga si Oliver Largo, residente sa Camparvel, Barangay Buhisan, atol sa buy-bust operation sayo sa kabuntagon sa Lunes.

Nasakmit gikan kang Largo ang kapin 55 gramos nga gituohang shabu nga adunay gibanabanang street value nga ?374,000. Matud sa PNP DEG SOU7, gi surveillance ang suspek sulod sa duha ka semana tungod sa impormasyon nga nalambigit siya sa ilegal nga pamaligya og droga sa Buhisan ug mga kasikbit nga barangay. Base sa imbestigasyon 50 gramos nga shabu matag semana ang iyang mabaligya kada semana, giingong ang iyang drugas gikan sa usa ka drug personality nga anaa na sa prisohan.

Si Largo nadakpan na niadtong 2024 ug nakagawas sa prisohan niadtong 2025.

Samtang sa Bohol, nasikop usab sa buy-bust operation sa Purok 2, Centro, Tubigon alas-2:01 sa hapon niadtong Septiyembre 13, ang 30-anyos nga walay trabaho nga si  alyas “Kiven.”

Ang operasyon gipangulohan sa PNP DEG SOU7 ubos sa koordinasyon sa IMEG 7, Regional Intelligence Unit 7, RDEU/RSPU 7, PDEA Region 7 ug Tubigon Municipal Police Station.

Nasakmit gikan sa suspek ang upat ka heat-sealed sachets nga adunay puti nga crystalline substance nga gituohang shabu, nga mitimbang og mokabat sa 425.6 gramos ug adunay gibanabanang SDP value nga ?2,894,080.

Nasakmit usab ang usa ka black belt bag ug buy-bust money nga adunay usa ka tinuod nga ?1,000 bill nga gisagolan og boodle money aron mopakita nga ?14,000.

Samtang P340,000 nga kantidad sa gidudahang shabu ug usa ka .9mm revolver ang nakumpiskar gikan sa usa ka 36-anyos nga high-value individual (HVI) atol sa buy-bust operation sa Sitio Lawis, Barangay Jugan, Consolacion, Cebu, niadtong Septiyembre 13. Ang suspek nadakpan sa mga operatiba sa Municipal Drug Enforcement Unit (MDEU) sa Consolacion Municipal Police Station human ma-validate ang impormasyon bahin sa iyang giingong kalambigitan sa ilegal nga kalihokan sa droga sa maong lugar. Gipahigayon ang operasyon sa koordinasyon sa Philippine Drug Enforcement Agency (PDEA).

Narekober gikan sa suspek ang 18 ka heat-sealed transparent plastic sachet nga gituohang shabu nga mokabat sa 50 gramos ug gibanabanang standard drug price nga P340,000.

Gawas sa gidudahang droga, nakumpiskar usab sa mga operatiba ang usa ka 9mm revolver nga adunay duha ka buhing bala. Narekober usab ang usa ka itom nga sling bag nga giingong gigamit sa pagdala sa gidudahang droga ug armas, lakip ang P500 nga marked money nga gigamit atol sa buy-bust operation.

Ang mga dinakpan mag-atubang og kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002, ug Republic Act 10591 o Comprehensive Firearms and Ammunition Regulation Act. (BANAT NEWS)