4-anyos na bata dedo sa sunog sa Pasig
MANILA, Philippines — Patay ang isang apat na taong gulang na batang lalaki habang sugatan ang kaniyang ina sa sunog na naganap sa residential area sa Pasig City nitong Sabado ng madaling araw.
Sa inisyal na ulat, ang bata ay na-trap sa ikalawang palapag ng kanilang bahay sa PUPHA Compound, District 4, Pinagbuhatan ng lungsod. Narekober din ang katawan ng bata pero agad itong binawian ng buhay.
Ang 47-anyos na ina ng bata ay nagtamo naman ng second degree burns sa magkabilang braso sa pagtatangkang iligtas ang anak.
Sa report ng Bureau of Fire Protection (BFP)-Pasig, dakong alas-2:22 ng madaling araw nang magsimula ang sunog sa nasabing lugar.
Mabilis namang kumalat ang apoy at natupok ang dalawang bahay sa nasabing compound na pinaninirahanan ng 5 pamilya.
Naapula naman ang sunog matapos na magresponde ang mga bumbero ganap na 2:46 ng madaling araw. Patuloy namang inaalam pa ng mga arson investigator ang sanhi ng sunog at halaga ng napinsalang ari-arian.
- Latest
