Rider na nambutas ng gulong ng motorista, ‘no show’ sa LTO

MANILA, Philippines — Inisnab kahapon ng rider na taga-Malabon City ang imbitasyon ng Land Transportation Office (LTO) kaugnay nang ipinalabas na “Show Cause Order” (SCO) para magpaliwanag sa ginawang pagbutas sa gulong ng isang delivery van na nakaalitan sa kalsada sa Quezon City.

Ayon kay  Renante Melitante, head ng LTO-Intelligence and Investigation Division hindi na magpapalabas ng isa pang SCO ang LTO laban sa rider dahil duma­ting naman ang abogado nito para magpaliwanag sa insidente.

 Gayunman, ayon sa LTO dahil wala ang viral rider  at hindi pumunta sa imbestigasyon ng LTO ay magpapalabas na lamang ng resolosyon ang ahensiya kaugnay ng insidente.

Magugunitang sa viral video, nakita ang rider na tinabihan ang delivery van at tila nakikipagtalo sa driver at maya-maya ay naglabas ng gamit na ipinantusok sa gulong ng van bago humarurot palayo.