18-anyos na tulak tiklo sa buy-bust

MANILA, Philippines – Bumagsak sa kamay ng mga awtoridad ang isa sa mi­yembro ng notoryus na Balweg-Navarro Group sa isinagawang buy-bust operation sa Sta. Mesa, Maynila, kamakalawa ng gabi.

Sa kulungan na inabot ng pagpapalit ng Bagong Taon ang suspek na si Llama Navarro Y Arguelles, 18, alyas King at Kokie, at nakatira sa #258-D Theresa Street sa Sta. Mesa, Maynila.

Sa police report na isinumite kay P/Chief Insp. Glenn Gonzales, hepe ng DAID-SOTG, dakong alas-7:30 ng gabi noong Martes, inilatag ang operasyon laban sa suspek dahil sa malawak na pagsusuplay ng iligal na droga sa National Capital Region.

“Kasama sa NCRPO watchlist ’yang Balweg-Navarro Group, malaking sindikato ‘yan na nag-ooperate sa Metro Manila,” pahayag ni PChief Insp. Gonzales.

Gumamit ng poseur-buyer ang grupo ni Gonzales at nang makabili ng iligal na droga sa halagang P500, ay sinalakay ang bahay nito.

Nasamsam sa suspek ang isang plastic ziplock na naglalaman ng 8-plastic sachet ng metamphetamine hydrochloride (shabu) at P500 bill.

Nakatakdang kasuhan sa Manila City Inquest Pro­secutor ang suspek dahil sa paglabag sa Republic Act 9165 Section 5 (drug pushing) at Section 11 (possession of illegal drugs) ang suspek.