Pasay police tiklo sa buy-bust
MANILA, Philippines - Arestado sa isinagawang buy-bust operation ang isang Pasay City police na nakumpiskahan ng P25,000 halaga ng shabu sa isinagawang operasyon, sa Maynila.
Kinilala ni P/Supt. Romulo Sapitula, hepe ng Manila Police District-Station 3 ang nadakip na parak na si PO2 Emil Yanga Tionson na nakatalaga sa Pasay City -Police Community Precinct (PCP)-9.
Sa surveillance at mga impormasyong nakalap umano ng tanggapan ni Sapitula, suplayer umano ng droga ang suspek sa ilang lugar sa Maynila tulad ng Sta. Cruz at Tondo kaya ibinilang siya sa watchlist bago pa naisagawa ang buy-bust operation.
Nabatid na nakipagkasundo ang suspek sa isang buyer na makipagkita sa isang lugar na sa Juan Luna St. malapit sa panulukan ng Yuseco St., sa Tondo, dakong alas-7:45 ng gabi, noong Miyerkules. Lingid sa kaalaman ng suspek na police asset’ ang kanyang ka-transaksiyon.
Sa puntong iyon ay agad na dinakma ang suspect na nasamsaman ng dalawang sachet ng shabu na may katumbas na halagang P25,000 at ilang piraso ng drug paraphernalia.
Nabatid din na nagtangka pang tumakas ni Yanga at sa pagsibad ay nabangga pa umano ang dalawang sasakyan ng mga operatiba at kamuntik nang mabunggo ang dalawang humuhuli sa kaniya na sina PO2 Exequiel Arevalo at PO2 Marvin Flores bago tuluyang nakorner ng mga umarestong awtoridad. (Ludy Bermudo)
- Latest
- Trending