Lab-as nga dugo maoy gusto ni Mascardo

Naukay ang tibuok balangay sa San Bartolome dihang dunay usa ka babaye nga hipalgan nga nagbuy-od sa may tanaman duol sa karaang balay ni Mr. Mascardo.

Ug matud pa sa mga polis nga maoy miimbestigar kabahin sa nahitabo sa babaye, ilang nasayran nga gikuhaan kini'g dugo kay wala na may dugo ang maong babaye. Kining maong babaye taga sityo Mangoling ug may nakaila niini nga nagtrabaho kuno kini sa usa ka restauran sa siyudad.

"Gibalbal ang maong babaye," hinay ang tingog ni Oscar nga taga sityo Anunang. "Dunay misuyop sa iyang dugo."

"A, binuang, dili ko motuo ana uy, Noy Oscar. Kun mao nay imong pagtuo duna diay mangtas nga ungo dinhi sa ato? Ug kun duna man, kinsa man bi?" ingon sa gibati'g katahap sagol kapikal si Mando sa gipahayag sa tiguwang musikiro.

"Dunay apo ni anhing Teodoro dinhi sa ato. Wala ka pa matawo Mando ug ako maoy nahibawo niini. Grabe ka mangtas kadto si Teodoro o Doroy. Ug kana si Mascardo mao ang iyang apo..." mikunot ang agtang ni Oscar. "Sige lang, kay ugma makigsulti ako kang Mascardo. Tuod, nianang pagkaugma sa hapon sa dako ug karaang balay ni Mascardo. Gipasulod ni Mascardo si Oscar.

"Lingkod, lingkod, Oscar," ni Mascardo ngadto sa tiguwang. Ug kun hunahunaon maingon nga susama ra sila'g pangidaron. Tingali, naa na sila sa setenta anyos ang panuigon.

"Ania ko Mascardo, kay gusto ko nga hunongon mo na," ni Oscar nga mitutok kang Mascardo. "Di ka ba maluoy sa taga dinhi sa atong lugar."

"Uhaw, uhaw kaayo, Oscar. Sayod ka na ting-init karong panahona ug gusto ko nga matagbaw sa preskong dugo sa tawo," miigham og kagalkal si Mascardo.

"Mascardo, kun dili ka mohunong pasayloa kong akoy mosumpo niini. Ang akong Alpa, di ba mao kini panguntra ninyo, kun ako na kining tugtogon, segurado man gyung mamatay ka..." hinay apan pinahiluna ang tingog ni Oscar. Unya nanaog siya sa karaang balay.

Human niadto wala nay gibalbal sa sityo. (Kataposan)