Tilaw sa katam-is - Gula 12

Human nila’g kaon ni Art ug Shane, medyo menus na ang misulod nga kustomer sa kan-anan. Layo na sila sa ubang kustomer.

“Puwede na ba kita nga magkasultihanay og maayo Shane?” si Art ang mibuak sa kahilom. “Sure, unsa ba ang atong panagsultihan?” matud sa dalaga.

Wala na lang g’yud magpalikuliko pa si Arthur. “Tingali, nakasabot ka g’yud nga nakagusto ko nimo Shane. Nalingaw kaayo ko kagabii nga nagbanus-banos kita sa pagkanta. Apan wala ko makasabot dihang gikanta mo isip tubag sa akong awit nga gipahinungod kanimo ang Sayang ni Claire dela Fuente,” matud ni Art.

“Tinuod g’yud diay ang giingon ni Lorena nga samtang gikanta nako ang Sayang, ingon sa mikulismaot kuno ang imong panagway nga naminaw,” ni Shane.

“Mao kana ang tinuod Shane. Mura’g sa imong kanta, nakagusto ka sa usa ka lalaki apan gianognan ka kay uwahi na ang tanan,” tukma ba ang akong pag-analisar?

Wala dayon motubag si Shane. Mura’g adunay gihuna-huna kun unsaon niya pagtubag ang ulitawo. “Nasayod ko nga prangka ka nga pagkatawo Art.

Gani, bisan sa kabag-o pa nato nga nagkaila, gidaygan mo dayon ako nga nakagusto ka kanako.”

“Tinuod kana Shane, dali ra kaayo ko nga nahigugma nimo,” ni Art nga seryoso kaayo ang panagway nga mitutok sa dalaga.

“Bisan ako, dili ‘sab ko magtago-tago nga ingon sa may pagbati ko nimo, apan sayang lang,” matud ni Shane.

“Apan ngano? Ngano nga na sayang man Shane?” gigunitan ni Art ang bukton sa dalaga. (Sumpayan)