Milagro ni Sr. Santo Niño

Lunes sa buntag nanuroy ang managtiayong Elsa ug Lando sa lungsod uban sa ilang duha ka mga anak nga sila si Mila ug Rigor. Unya namalit  sila og mga pagkaon. Ug may gihangyo si Rigor sa iyang amahan.

“Papa Lando, manuroy mi ni Mila karong gabii kay may kalingawan sa lungsod....”

“Wala’y problema mga anak! Pero sayo baya mo’g pauli ha...!”

Sa didto na sila sa kalingawan daghan kaayo ang mga tawo sa palibot. Apan sa kalit lang may mga tawo nga naglumbaanay sa pagdagan. Wala damha naigo sa saag nga bala si Rigor sa nanag-away nga mga batan-on. Ug daling gidala sa tambalanan sa siyudad.

Sa tambalanan puwerting hilak ni Mila nga nagpaabot sa resulta sa operasyon. Unya nag-ampo siya duol sa operating room nga piniyong ang mga mata. Apan sa kalit lang may mga tunob nga nabati si Mila nga nagpadulong kaniya. Ug nitapad na ang tag-iya sa mga tunob. Daling gibuka ang mga mata ni Mila aron mailhan ang tag-iya sa mga tunob. Nahaigking si Mila kay usa ka bata nga nagpahiyom kaniya. Unya nagpahibalo nga luwas na si Rigor dayong lakaw sa unahan.

Apan nahibulong si Mila kay nahanaw sa iyang panan-aw, sa tanto niyang tan-aw sa palibot sa tambalanan nagbaga ang mga mata ni Mila. Tungod kay may rebolto nga susama og dagway sa bata nga bag-o pa lang nilakaw nga duol sa iyang gibarogan nga gibutang sa tambalanan.

Wa maglangay ni abli ang pultahan sa tambalanan. Ug nagpahibalo ang doktor nga pwede nang makauli sa ilaha. Pagkataudtaod nakita niya ang iyang inahan nga nagpadulong kaniya.

“Mama Elsa, luwas na si kuya Rigor. Ug kanang duol sa imong gibarogan nga naay usa ka rebolto ni Sr. Santo Niño nga gibutang sa tambalanan, mao kana ang nagpakita nako kaganina,” ni Mila.

“Mila, nakasabot nako ... siya ang nitabang ni Rigor. Kining nahitabo sa imong igsoon ... usa ka milagro ni Sr. Santo Niño!” (Katapusan)