Salamat sa Pasko

Adlaw sa Pasko. Nagpasad ang kabataan sa lungsod sa Alegria. Bibo kaayo silang sud-ungon. Adunay mga bata nga nagpabuto’g rebentador. May nanaygon nga giawit ang kasadya ning taknaa. Apan kadaghanan mibisita sa ilang ninong ug ninang aron mangayo’g pinaskohan. Usa na niini si Abe nga mibisita sa balay ni ninang Elen niya.

“Ninang Elen, nia ko kay Pasko man, mangayo ko’g pinaskohan,” arangkada ni Abe, ang otso anyos  nga kinugos sa bunyag ni Elen.

“Way problema, ako nang giandam, pero kantahi ko,” hangyo ni Elen.

“Ayaw lang ko pakantaha, ninang, wa man ko, manaygon,” ni Abe nga gikahimut-an ni Elen.

Nalingaw si Elen sa tabian niyang kinugos. Human madawat ni Abe ang pinaskohang  gihatag sa iyang ninang Elen misutoy siya’g lakaw nga wa mananghid. Hilabihang lipaya ni Abe nga Teddy Bear maoy iyang nakita sa dihang giablihan ni Mama Riza niya ang pinaskohan.

“Ma Riza, tulo nay akong Teddy Bear, pulong ni Abe sa kalipay .

“Ampingi gyud na’g maayo, Abe, kay pinaskohan nang ninang Elen, nimo,” pahimangno ni Mama Riza ni Abe.

Wa mahipos ni Abe ang iyang pinaskohan kay mikuyog ni Mama Riza  nga mibisita sa balay ni komare Nida niya. Sa pag-uli nila sa balay wala na ang Teddy Bear ni Abe. Iyang gipangita ug nakita nga gikugos ni Kyla ilang silingan.

“Nganong imo man tawon nang gikuha, Kyla?”  sukna ni Abe.

“Pasayloa ko, Abe, naibog man ko, kay wa gyud koy pinaskohan. Ako ning iuli nimo,” pangatarungan ni Kyla nga katalirunga’g edad ni Abe.

“Gipasaylo ka nako, Kyla, tungod kay Pasko karon. Imo na kanang Teddy Bear, nga akong ihatag nimong pinaskohan,” ni Abe nga tugob sa kalipay.

Gigakos ni Kyla si Abe sa kalipay. Nagpasalamat siya nga gipasaylo ni Abe tungod sa Pasko ug nakaangko’g Teddy Bear ug nakatuaw “Salamat sa Pasko,” (Katapusan)