Ang komedyante

Gula 6

Mihinay na ang pagbunok sa uwan. Namiya ang paresan sa mag-uyab nga kauban nila ni Elly ug Rizza Mae sa pagpasilong sa gamay’ng payag-payag nga gigamit isip tindahan. Gikulbaan si Rizza Mae kay sila na lang ang nahabilin. “Mamiya na ta dinhi kay dili na tingali magpadayon ang disco,” giingnan ni Rizza Mae ang taga radyo nga si Elly.

“Ayaw usa, anhi usa ta,” matud ni Elly nga migakos na g’yud pag-ayo sa dalaga. Wala g’yud makabalibad si Rizza Mae diha’ng gihagkan siya ni Elly. “Kalain nimo Elly uy, manggakos ug manghawok ka man nga dili man ta uyab,” ni Rizza Mae.

“Unsa may problema ana, gikan karon Rizz, uyab na ta’ng duha,” matud ni Elly nga nagpahiyom ug mipadayon sa pagparayeg kang Rizza Mae.

Walay nahimo si Rizza Mae gawas nga gipaundayonan na lang niya si Elly nga miparayeg pag-ayo kaniya. Sa hilom, nakagusto usab si Rizza Mae kang Elly gikan pa niadto’ng adlaw nga iya kini’ng nakita nga mihimo’g variety show sa Labangon ang ilang grupo.

Miduyog g’yud ang higayon kang Elly kay mibalik sa pagbunok ang kusog nga uwan. Misipa ang kusog nga liti ug dugdog, ug takulahaw lang nga napawong ang suga.

Mikalit kamingaw ang dapit nga ilang nahimutangan. “Hala, basin pangitaon na ko karon nila ni Mama,” matud ni Rizza Mae. Wala maminaw si Elly sa gisulti ni Rizza Mae kay gipahimudsan niya ang kangiob sa palibot. Giukoban ni Elly ang mga ngabil ni Rizza Mae. Ingon sa nalum-oy si Rizza sa kalalim nga iyang gibati ug wala na makabalibad diha’ng gihapohap ni Elly ang iyang kalawasan.

Ingon sa mipaspas ang pagginhawa ni Rizza Mae. Misukol na siya sa pakigparayganay kang Elly. Nakurat sila’ng duha kay kalit lang mihugyaw ang katawhan gikan sa kabalayan.

Misiga na diay pagbalik ang suga ug mituang na ang uwan. “Tana uy,” matud sa dalaga. “Sige, pero ugma magkita ta ha?” ni Elly. (Sumpayan)