Ang tubig nga giinom sa ungo

Mihayag na ang langit sa silaw sa adlaw. Apan wa gyu’y nabiktima si Noy Ognu, nga bag-o pang naungo, sa una niyang pagpamalbal, sugod ganinang alas-dose sa gabii nga mao gyu’y pagtakdol sa buwan.

Mihupas na lang ang kakalkag sa tag-as niyang buhok, ang kasiga ug kapuwa sa iyang mga mata, ang katalinis sa iyang mga ngipon, kuko ug ilong.

Hangtud mitugpa na lang siya sa yuta nga nagbarag-barag mora’g hubog nga molakaw, tungod sa kaduka, kakapoy ug kagutom nga gibati. Unsaon di pa man gud siya kabawo mo-drive sa iyang mga  pako.

Nagkabangga-bangga siya sa mga lubi, kakahoyan, building ug kabalayan. Nagkasangitsangit pa gyud sa mga wire sa telepono ug kuryente. Mapadpad pa siya sa huros sa hangin, di siya kabawong mosugat. Di siya kabawo mo-dive aron pagsignit sa iyang biktimahon.

Adto man gung niaging semana may naagian siyang usa ka babaye nga tiguwang pa kaniya nagbuy-od sa karsada sa alas-dose sa tungang gabii ang takna. Gikan siya adto nanguwag kay tiguwang ulitawo lagi.

Dihang iya kining gidungawan kalit man siyang gikuptan ug gi-lips to lips. Ug iya na lang natagamtaman nga mora’g dunay jolen nga misud sa iyang tiyan. Dayon giingnan siya sa tiguwang babaye nga nagsul-ob og lubos itom nga besteda.

“Sugod sunod semana ikaw na ang mopadayon sa among kaliwatan nga pagka-ungo!” Diha-diha nalup-og balik ang tiguwang. Ug sud lang sa usa ka segundo nahimo kining abo.

Kalit lang mitulo ang laway ni Noy Ognu, dihang may nasugatan siyang usa ka batan-ong lalaki sa may eskina dili halayo sa simbahan. Iya ta kining balbalon apan nahinumdom siya nga wan-a man diay siya’y mga tango ug kuko. Nahibalik na siya sa ordinaryong pagkatawo. Usa ka tiguwang nga daut nga ngipon, kunot ang panit. Edad saysenta-isayes.

Tungod sa kalagot iyang gikalit paglabnot ang mineral water nga gibitbit sa batan-ong lalaki ug giyarok pag-inom tungod sa kauhaw. Apan kalit lang miinit iyang tiyan ug miaso ang baba.

“Ayay! init gud ini? Usna may brand ining imong mineral water, Dong?” Matud ni Noy Ognu-Ungo, nga naghapu-hapuhap sa iyang tiyan ug baba.

“Holy Water, Noy!” matud sa batan-on. (Katapusan)