Ang mini-skirt ni Shiela
“Mosimba ka, Shiela? Manday dili Domingo mosimba na hinuon ka? Unya’g Domingo ug pyestang iglilihi maglisod si mama nimo sa pagpukaw nimo aron ka makasimba’g sayo. Mag unya-unya ka lang, hangtod nga dili ka na hinuon makasimba? Karong dili Domingo, dili pyestang iglilihi, gana kaayo kang mosimba? Unsa man na?†Nangutana si Lolo Osting kang Shiela.
“Ang-ang, Lo og dili ko manegurong makasimba. Dili mi magkita ni Charlene, kay adto man mi magkita sa simbahan. Kay motambong man siya sa bunyag sa iyang pag-umangkon?†tubag ni Shiela.
“Unya, kanang imong gisul-ob, pang simbahan na? Nga hilabihan man ka mubo ana?†Paghuo’g ra go’g ballpen, unya punita. Dili ba makita na kanang imong panty,†ni lolo Osting pa. “Sa panahon ni lola nimo…†Sumpayan pa unta ni lolo Osting ang iyang sermon, apan mitalikod na si Shiela.
Nagkalayo nga nagsulti si Shiela, “Ambot nimo, Lo, diha ka na.. .Ka saba ba nimo. Old fashion kaayo ka…†Nawaa na sa panan-aw ni lolo Osting si Shiela. Nagpangusmo si Lolo Osting.
Migabii na lang, wa gyod mahiuli si Shiela. Nabalaka si Lolo Osting, kay wa ra ba si Delia nga inahan ni Shiela. Tua sa Talibon, usa ka lungsod sa Bohol kay nagluhod og kasal. Nakatagpilaw na lang si lolo Osting sa iyang gilingkoran, hangtod nga may nanuktok sa pultahan. Mibarog si lolo Osting, pamasin nga si Shiela na ang miabot. Pag-abli niya, polis ang misugat sa iyang panan-aw.
“Dunay napalgang patay sa daplin sa sapa. Nakit-an ang ID, ug mao kini ang address niya sa ID. Shiela Laborte ang ngan. Wa pa namo makita ang iyang senina. Pero may nakakita niya nga gikan sa simbahan. Mini-skirt nga puwa nga may badlis nga itom sa hawak kuno ang iyang gisul-ob. Unsa ka tinuod?†sa polis pa.
Misugod sa paghilak si Lolo Osting. “Si Shiela..ang akong apo. Oo, nagsul-ob siya og mini-skirt…†(Kataposan)
- Latest
