I love you 1000

Dear Tita Salie,

Maayong adlaw. Tagoa lang ko sa pangalan nga Joshua, 53 years old na ko. Duna koy nasuod nga babaye tawgon lang nato siya og si Ms. Sceptic, 23 pa siya ug usa ka estudyante sa usa ka sikat nga University dinhi sa Sugbo.

Buotan kaayo kining bayhana. Dili ako’y nagasto kaniya sa eskuylahan tungod kay may income man ang iyang papa. Nitabang lang ko niya alang sa iyang allowances. Ako siyang hatagan og tag 1,000 kun mo-text siya nako nga wala siya’y kwarta.

Sa laktod nga pagkasulti duna gyod mi relasyon ni Ms. Sceptic. Ug nahimo namong tawganay ang “I love you 1000,” kay manawag siya ug moingon nga I love you ug tagaan dayon nako siya og 1000. Kapin na sa tuig nga ingon niini ang among sitwasyon.

Apan wala ko magdahom nga mausab diay kining bayhana. Kay duna siya’y nakaila nga lalaki 30+ ang pangedaron ug nanguyab usab kaniya. Pero (one) click ra man, nagkauyab dayon sila. Dili pa gyod moangkon si Ms. Sceptic. Bakakon na kaayo, bisan ako silang nakit-an nga loving kaayo. Pero matud niya nga bisobiso ra kuno ang ilang gibuhat.

Karon nga wala na koy ikahatag kaniya nga 1000 tungod kay wala na man koy income dili na siya mopakita nako ug bisan text wala na gyod. Unsa mang klaseha sa babaye si Ms. Sceptic, Tita? Palihog pasabta ko. Thank you very much and God bless. -- Josh

* * *

Maayong adlaw, Josh. Naanad ang atong mentality nga ang mga lalaki lang ang makamao magbinuang. Naanad ang atong hunahuna nga ang babaye hinhin kaayo ug buotan. Apan sa pagpanglabay sa mga tuig ang kinaiya sa mga tawo nausab pod. Kun sa una ang mga lalaki lang ang mogawas sa balay aron mangita og panginabuhian, lahi na karon kay ang mga babaye makamao na usab sa mga trabaho nga buhatonon sa lalaki.

Sa gibuhat ni Ms. Sceptic kanimo tataw kaayo nga igo ka lang niyang gigamit. Nipatol siya kanimo tungod kay nasayod siya nga duna kay kwarta. Nagpasabot kini nga wala siya’y gugma kanimo.

Wala ka nay laing mahimo gawas sa pagdawat sa nahitabo. Tungod kay wala kay ikagukod kaniya. Maklaro na usab kini sa inyong tawagan nga “I love you 1000”, kay karon nga wala ka nay, 1000 dili na usab nimo mabati ang “I love you.”

Dawata ang kamatuoran nga pareho lamang kamong duha nagginamitay. -- Tita Salie