Masahesta

Gula 5

Milukso sa kalipay si Nelly pagkakita nga tibuok usa ka libo ka pesos ang gitunol ni Cesar kaniya isip tip sa iyang pagmasahe.

“Salamat kaayo sir ha, gamay na lang g’yud ang kuwang sa akong pang-tuition karong Martes,” matud sa masahesta. Nalipay si Cesar nga nahinangop kaayo si Nelly sa gihatag niya nga tip. Gipangayoan niya’g contact numbers ang masahesta. Gitunol ni Cesar ang iyang selpon ug si Nelly na ang mi-encode sa iyang numero. “Balik-balik sir ha?” giingnan ni Nelly si Cesar. Gaan kaayo ang pamati ni Cesar sa iyang panglawas human siya masahii ni Nelly.

“Gwapa g’yud nga pagkabata, unya buotan pa gayud,” nagtabi-tabi si Cesar sa iyang kaugalingon samtang nagmaneho sa iyang sakyanan pauli sa iyang gipuy-an nga apartment didto sa Mabolo.

Apan kalit lang misantop sa kaisipan ni Cesar ang gisulti ni Nelly dihang nakakita sa dalaga ang gihatag niya nga tip nga tibuok usa ka libo ka pesos. Nahuna-huna ni Cesar nga naproblema diay sa pangbayad sa tunghaan si Nelly.

Pag-abot ni Cesar sa iyang gipuy-an, gikuha niya ang iyang selpon. Nakahinumdom si Cesar nga magpa-return call diay ang amigo niya nga si Philipp. Gipindot ni Cesar ang iyang mga numero nga gitawgan aron madali ra ang pagpangita sa numero sa iyang higala.

Apan napasiga ang iyang mga mata kay dunay numero nga gitawgan gamit ang iyang selpon nga dili niya kabisado. Bisan giunsa niya og huna-huna, wala siya magdayal niining maong numero nga narehestro sa ngalan nga Camel sa iyang phone book.

Gitan-aw niya ang oras sa pagtawag. Misamot ang iyang kalibog kay atul kini nga didto pa siya sa massage parlor.

Gibatil pa gayud ni Cesar ang iyang utok kun kinsa ang numero nga gi-encode niya sa ngalang Camel, apan wala gayud siya makahinumdom. Nakatagpilaw na lang si Cesar. Napugwat si Cesar sa iyang pagkatagpilaw kay kalit nga mitingog ang message alert sa iyang selpon.

“Sir natulog ka na? si Camel ni sir kadtong nagmasahe nimo ganina, dili g’yud Nelly ang akong ngalan, alyas ra ang Nelly. Kay buotan man ka mao nga tug-anan tika sa akong ngalan.”

Nakapahiyom si Cesar. Karon pa siya nakahuna-huna nga gi-dial diay sa masahesta ang iyang numero aron makuha ang numero ni Cesar. (Sumpayan)