Masahesta

Mihapa si Cesar sa gamay'ng kotson nga gipatong sa katre nga hinimo sa kahoy. Taud-taud, nabatyagan na ang kamot sa masahesta nga mihaplas kaniya og dangog nga likido nga nagdala og hang. Nasayud na siya og unsa kadto ang gihaplas sa masahesta kaniya.

Giaplayan og gamay'ng kusug sa masahesta ang pagtapion sa iyang duha ka kamot ngadto sa buko-buko ni Cesar. Miagulo si Cesar sa kalalim sa iyang gibati. Naalinggatan gayud niya nga nanguto-kuto ang iyang buko-buko nga giayo'g hapyod sa masahesta.

"Daghan ka man diay'g panuhot sir, mao diay nga mora'g luya ka sa akong tan-aw nimo kaganina," matud ni Nelly. "Mao lagi, ayoha ko'g masahe kay ako ra'y mahibawo nga mohatag og tip nimo," ni Cesar pa.

Wala magtingog si Cesar samtang giayo'g masahe ni Nelly. Hangtud nga namatikdan niya nga inanay'ng mibalik ang iyang kalagsik. "Hayang sir kay ang imong bukton ug atubangan nga bahin sa paa ug bitiis na usab ang atong masahean," giingnan si Cesar ni Nelly.

Wala dayon mohayang si Cesar. Mauwaw siya kay mora'g nangisog si junior. "Karong taud-taud na Nell kay mauwaw ko." Nasabtan dayon kini ni Nelly kun unsay buot niya ipasabot.

"Ayaw kabalaka sir uy, anad na mi ana kun makakita nga mausab ang porma sa brep sa among lalaki nga customer," matud ni Nelly nga nagpahiyom. "Mao ba? Tinuod ba ang giingon sa uban Nell nga sagad sa mga masahesta modawat og extra job?" gisukna ni Cesar si Nelly.

"Wala ko makahibawo sa uban sir, basta ako wala gayud ko maghimo ana kay nagbinuotan ko sir kay may panglantaw ko sa akong kaugmaon," pasabut ni Nelly kang Cesar samtang nagpislit-pislit sa paa sa iyang customer.

Giingnan ni Nelly si Cesar nga dili gayud unta siya gusto nga magmasahesta kay bati ang dungog niini apan wala siya'y laing trabaho nga masudlan aron makakwarta ug makapadayon sa iyang pag-eskwela.

"Bisan kausa Nell wala ka gayud modawat og extra job sa imong customer?" nangutana pag-usab si Cesar sa batan-ong masahesta. "Wala g'yud tawon sir, nagbinuotan gayud ko sa akong trabaho," dali nga tubag sa masahesta.

Gitutokan ni Cesar ang masahesta. Daw napahit ni Cesar ang iyang mga ngabil nga nagtan-aw sa dagway sa babaye nga inosente kaayo nga nagmasahe kaniya. Gisuwayan og hikap ni Cesar ang hawak ni Nelly. (Sumpayan)