Swimming Lesson - Gula 5

Nabantayan ni Philipp nga ang duha ka kaubang babaye ni Zeny nga didto milingkod sa distansya nga lingkoranan sa ilang nahimutangan, nagsige og pasiplat kanila.

"Tsismoso man diay kanang duha nimo ka kaubang babaye Zen kay magsige sila'g pasiplat nato," giingnan ni Philipp ang dalaga sa hagawhaw nga tingog. "Ikaw man gud misikit ka pag-ayo nako," ni Zeny pa. Nanginit ang lawas ni Philipp samtang gihinol-hinol niya ang kamot ni Zeny. Balbon ang bukton sa dalaga. Si Zeny sa iyang bahin nagpatara lang nga gisigihan og hapuhap sa reporter ang iyang balbon nga bukton.

Sa hilom nakagusto si Zeny sa gihimo kaniya ni Philipp mao nga iya lang kini nga gipasagdahan nga nagsige og hapyod sa iyang bukton ug mipislit-pislit sa iyang palad. "I love you Zen," matud ni Philipp sa hagawhaw gihapon nga tingog.

Takulahaw lang nga misakdap sa kaisipan ni Zeny kadtong mga gutlo nga gitudloan siya’g langoy sa dagat ni Philipp. Duna man go'y mga higayon nga mabag-id g'yud ang kamot ni Philipp sa mga sensitibong parte sa lawas ni Zeny.

Alang ni Zeny kadto maoy dili niya dayon makalimtan nga yugto sa ilang panagsuod. Naputol ang iyang paghanduraw dihang nabantayan niya ang tuo nga bukton ni Philipp nga miagbay kaniya.

Gusto unta ni Zeny nga pasagdan na lang si Philipp nga moagbay kaniya bisan og wala pa niya kini sugta sa gihalad niini nga gugma. "Ayaw ko'g agbayi Philipp kay anaa ang duha nako ka kaubang call center agents," ni Zeny pa nga mihinay og tangtang sa bukton sa reporter nga nag-agbay kaniya.

Wala motingog si Philipp ug mituman sa hangyo ni Zeny. Gipahit sa reporter ang iyang mga ngabil kay ingon sa gigamhan na unta siya sa talagsaong pagbati. Ang nangalimyon nga pahumot nga gigamit ni Zeny maoy nakapadugang sa pusta.

Kaganina ra nga naglaway si Philipp nga hagkan na niya si Zeny. Nahuman na lang ang salida nga ilang gitan-aw ug wala gayud mapasugot sa reporter ang dalaga. Gikan sa sinehan, nanggawas sila sa mall ug nanakay'g taksi.

"Bangkahan ko kamo og midnight snack," matud ni Philipp. Nangalipay ang mga babaye mao nga gimandoan ni Philipp ang taksi driver nga ihatud sila sa Fuente Osmeña. Apan wala sila magdugay kay human sila makakaon, nag-iya-iya sila'g pamauli.

"Kamo na lay kuyog pauli Zen si Philipp kay dia ra man mi nagpuyo si Lynlyn sa B. Rodriguez," matud sa kauban nilang babaye nga si Sally. (Sumpayan)