Subli nga Panagkita

Gula 7

Gitagbaw nila ni Roel ug Myrna ang ilang kaugalingon sa pagparayganay. Apan kutob ra sila sa romansa tungod kay gamay ra kaayo ang payag sa mananagat nga ilang napasilongan.

Milurang ang uwan. “Pauli usa ta sa balay Roel kay mag-ilis ta. Basa kaayo ang akong sinena. Ikaw tuay T-shirt didto nga iya sa akong bana nga langyaw, may magamit ka didto,” ni Myrna pa.

Mipasignunot na lang si Roel kang Myrna. Giagbayan niya kini samtang nanglakaw sila subay niadtong dalan-dalan paingon sa bukid nga nahimutangan sa balay ni Myrna.

Gisangpit ni Myrna ang iyang duha ka iyaan pag-abot nila sa koral, apan walay mitubag. Gibuksan na lang niya ang pultahan sa iyang duplicate nga yawe. “Tiya! Tiya! Wala may tawo,” ni Myrna pa.

Nanulod sila si Myrna ug Roel sa balay. Nasayran nila nga wala g’yud diay didto ang duha ka iyaan ni Myrna. “Mipauli tingali sila si Tiya sa ilang balay kay nagtuo nga dugay pa ko mauli,” giingnan ni Myrna si Roel.

Misulod si Myrna sa kwarto. Taud-taud, migawas kini nga nagbitbit og polo shirt para ni Roel. “Huboa kanang basa nimo nga T-shirt Roel, unya isul-ob ni,” gitunol ni Myrna ang polo shirt.

Gihukas ni Roel ang basa niya nga T-shirt. Mitutok kaniya si Myrna. “Ikaw, pag-ilis na kay basa man kaha kanang imong gisul-ob Myrn,” matud ni Roel. Nahinumdom si Roel nga sila ra diay’ng duha karon sa balay.

Wala niya idayon pagsul-ob ang gitunol nga polo shirt ni Myrna. Giagbayan niya si Myrna ug gihagkan. “Hukason nato kining basa nimo nga sinena Myrn para makailis ka og uga nga sapot,” giingnan ni Roel si Myrna.

Migakus si Myrna kang Roel. “Tana, adto ta sa kwarto kay basin dunay makakita nato dinhi. Tingali og mobalik kadto sila si Tiya,” matud ni Myrna. Gipahimudsan ni Roel ang higayon.

Gidimdim nila ang katam-is sa gugma nga wala dayon nila maangkon dihang una sila nga nagkaila kapin sa napulo ka tuig na ang nakalabay. Human sa ilang pagparayganay, nadungog nila ang sound system sa Giloctog nga nagtukar na.

“Bahala na tong kalingawan Myrn. Dili kalingawan ang akong gianhi sa Barili kun dili ikaw,” gihagkan pag-usab ni Roel si Myrna.

“Ayaw na lang pagpauli sa siyudad Roel. Dinhi na lang ta kay duna na man ko’y mga negosyo nga makabuhi nato. Tabangi na lang ko pag-manage sa negosyo,” ni Myrna pa nga migakus kang Roel.

“Ikaw ang masunod my love,” gihagkan ni Roel si Myrna. (Kataposan)