Kamatayon sa panumpa

Gipatawag dayon ni Madam Minorka si Xenia ug gipakigsultihan bahin sa pabor nga gipangayo ni Mr. Waldon.

“Bisan karon rang gabhiona, Xenia,” nagkanayon si Madam Minorka. “Naikog lang ko ni Mr. Waldon.”

Wala makabalibad si Xenia sa hangyo sa manager. Dihadiha, gidala siya ni Madam Minorka ngadto sa table nga giokupar ni Mr. Waldon ug sa pipila ka bodyguard niini. Gipaila dayon siya sa manager ngadto ni Mr. Waldon.

“Ikaw nay maantigong mo-entertain nila, Xenia,” sa manager pa.

“Yes, Madam,” mubong tubag ni Xenia.

Dihang nakalakaw na si Madam Minorka, si Mr. Waldon misugod dayon sa pagpakigsulti kang Xenia. Ang mga bodyguard niini nagpaminaw lang sa ilang gipanagsultihan. Wala madugay, nagpalayo ang mga bodyguard ni Mr. Waldon aron kaha dili masamok ang ilang panagsulti.

Kaadlawon nang mibiya si Mr. Waldon sa club apan nagbilin kini’g P5,000 nga tip ngadto kang Xenia.

Pagkasunod gabii, mibalik si Mr. Waldon sa UCV’s Sky Is The Limit. Mihangyo na usab kini sa manager nga i-table si Xenia.

Wala gihapon makabalibad si Xenia dihang gihangyo siya ni Madam Minorka nga makig-table kang Mr. Waldon. -- Sumpayan pa

Bawion ko ang imong gugma

Ni Rosalie Vallecera

“Mao usab kana ang akong bation, An, kun magkalagyo ta. Pero gikinahanglan nato ang pagsakripisyo. Total, dili man dumalayon ang atong panaglagyo. Mobalik man ko dinhi kun makatapos na ko sa akong pagtuon. Antoson lang una nato ang kamingaw sa usa’g-usa.”

“Ikaw tingali makaantos. Pero ako...”

Miundang na si Annie sa pagkaon. Wala siya ganahi bisan og lamian ang mga pagkaon nga ilang giorder gumikan kay gisumsoman man kini sa dili makalipay nga balita alang kaniya nga gitaho ni Edelmar.

“Ang kamingaw anaa lang sa sinugdan, An,” mialam-alam si Edelmar. “Pero kun maanad ka na sa kamingaw, dili ka na maapektohan niini.”

Nasuta ni Annie nga bug-os na ang hukom ni Edelmar. Dili na gayod malubag pa ang desisyon niini pag-adto sa Leyte aron mo-eskuyla. Unsa pa bay iyang mahimo aron mapugngan ang iyang hinigugma? Angay ba gayod niyang pugngan ang tawo nga gustong mangita og tingusbawan sa kinabuhi? Mag-unsa na lang ang ilang gugma?

“Mosugot ka ba, An?” Gisukna siya ni Edelmar pagkilab sa pipila ka daklit.

Wala motingog si Annie.

“Sabta ko, An,” ni Edelmar pa. “Please...”

“Kun akong pagbuot maoy masunod,” ni Annie pa, “dili gyud unta ko mosugot. Di ko gustong magkalagyo ta.” -- Sumpayan pa