Lovers in Pari-an

Gula 34

Nakahukom siyang mobalik na lang sa iyang lawak aron matulog na usab. Apan napahunong siya dihang may naalinggatan siya nga nakakabig sa iyang pagtagad. Didto dapit sa nahimutangan sa sakyanan, may nakita siyang bulto sa bayhon sa usa ka tawo.

Nakaseguro siyang tawo gayod kini kay dili man kaayo ngitngit ang palibot. Maabot ang garahe sa dan-ag sa sugang dagitabnon nga nahimutang sa atubangang bahin sa dakong balay nga maoy nakalamdag sa lagwerta. Wala lang matandangi sa kahayag ang tawo nga nakita ni Rosalinda maong wala niya kini maklaro.

“B-Bongkoy...?” Nanaghap siya pagsangpit.

“Rosalinda....” tubag sa lalaki nga mao gayod diay ang nakita ni Rosalinda.

“Daan pa lagi ko nga ikaw gyud kana,” ni Rosalinda pa dayong duol.

Mitindog si Bongkoy dihang nahiduol na siya ug gihatag ngadto kaniya ang gilingkoran niining bangkito. Mibalibad siya apan namugos kini. Milingkod na lang si Rosalinda sa gitanyag nga lingkoranan human makapasalamat.

“Abi ko’g natulog ka na?” Gikan ni Rosalinda.

“Wa pa ko batiag duka,” maoy tubag.

“Nag-unsa ka man dinhi?”

“Wa lang. Naghinuktok.” -- Sumpayan pa