Feeling entitled nga ka-MU

Dear Tito Miguel ,

Ako diay si  Kyle , taga Consolacion , Cebu. Naa ko'y gidiskartehan sulod na sa pila ka buwan. Naa na sa "mutual understanding" or MU and ang among status karon. Akong problema ron , magbout naman siya sa akong mga buhaton uy sama sa pakig -bonding nako sa akong friends ,ug  sige siya pangita og bikil . In short natouk nako sa iyang batasan.Gikapoy na baya ko , ako nalang kaha ni siya buhian nu?   —Kyle

* * *

Kyle,

Sayon ra kaayo, ka’y MU pa man mo, wala pa kay gipasalig kaniya nga iyang ipaningil kanimo.  Gani, dili na ka mistil mananghid, ka’y wala man mo’y pormal nga gisabutan. Kun wa pa ka mahigugma niya, biya na, aron dili ka mahinayak. Dili pa gani mo uyab, entitled na. Unsa na lang kaha’g uyab na mo, samot ka tuk-on ug kontrolahon. Nagbaga nga red flag.

Pero kun duna na ka’y gibati para niya, paminawa imong kaugalingon, kaya ba nimo siya talikdan? Kun kaya pa, biya na samtang dili pa ka mahisugamak. Apan kun maglisod na ka’g biya ka’y nipilit na ka, pangutan-a imong kaugalingon, kaya ba nimo ang maong matang sa babaye?

Kay natural ra na niya ang mangita’g bikil ug kontrolar nimo. Kun imo badlongon o suklan, posible iyang kuhaan. Apan temporaryo ra na, mobalik gihapon ang tinuod nga batasan. Labi na’g uyab na mo o dili ba kaha maminyo. Lisod na usbon, para niya wala siya’y nakitang sayop sa iyang kaugalingon, busa wala’y angay tul-iron. Gani, kun moreklamo ka ikaw pa ang sayop.

Ikaw ra ang makahukom. Pero ka’y karon nag reklamo na man ka, biya na samtang sayo pa. Kun ikaw mopadayon ug samot nga tuk-on, wala’y lain mabasol kun dili imong kaugalingon. Kita na ka sa batasan nga di makaon, gihungit nimo gihapon.  —Tito Miguel

Magpatambag ka? Ipada kang Tito Miguel: 0991-318-9366