Gihadlok sa iyang kabit

Dear Tito Miguel,

Maayong adlaw, ako diay si Bernard, taga Capitol Site, Cebu City. Naproblema ko og maayo ron, unsaon nako pagbiya sa akong kabit nga si Angela. Kun ako siya nga biyaan, mosaba daw siya  sa akong girlfriend kalabot sa among tinagoan nga relasyon. Unsa ang angyan nakong buhaton Tito Miguel ? Gihadlok naman hinuon ko sa akong kabit.  Bernard

* * *

Bernard,

Kun magpakita ka nga nahadlok sa bahad sa imong ikaduha, maulipon ug mabilanggo gyud ka niya. Kun desidido na ka mobiya niya, kumpisal sa imong uyab nga nakasala ka, pangayo g pasaylo. Sa primero awayon gyud ka, siya masakitan kay imo siya nga gibudhian. Pero kun tiunay ka niya nga gihigugma, pasayloon ra gihapon ka niya, hataga g laing higayon.

Gubot sa primero, pero kinahanglan agian nimo aron ka makaangko g kalinaw. Kun biyaan gyud ka sa imong uyab, wala na kay mahimo ka y nakasala man ka. Apan kun nahigugma gyud ka niya, gukda, pangamuyo, pangayo g ikaduhang higayon ug pasalig nga dili na nimo usbon. Kasagaran sa gibudhian, gisakitan lamang, apan sa paghigugma kanimo wala moundang.

Ini g labay sa panahon, mapasaylo ra gihapon ka, mag-uli mong duha. Kun kana mahitabo, wala na kay angay kahadlokan sa imong ikaduha. Wala na siya y ikasumbong sa imong uyab, kay giunhan na nimo g padayag. Gani, kun mosumbong imong ikaduha, lagmit maawayan pa siya. Ang imong uyab na ang modepensa kanimo. Sa maong paagi, makalingkawas ka sa hulga niya ug sa imong kaugalingong bakak ug panlingla sa imong uyab mismo. Labaw sa tanan, wala na kay gibudhian. Gani, hasta ang imong ikaduha, makatagamtam sad og kagawasan gikan sa relasyon nga dunay giilad ug gibudhian.  Tito Miguel

Magpatambag ka? Ipada kang Tito Miguel: 0991-318-9366