Ang Impiyerno ni Belen - 2

Gula 116

“Pero tingalig madakpan ka sa mga awtoridad.”

“Mag-amping lang. Hinuon, dili man tanang tigpatuman sa balaod seryoso sa ilang trabaho. Naay uban nga masubornohan.”

Usa ka adlaw niana, may nanawag sa telepono (landline). Dihang akong gitubag, tingog sa usa ka lalaki ang akong nabati didto sa pikas tumoy sa linya sa telepono.

“K-kinsa ni?” Gipangutana nako ang nanawag.

“Si Carter ni,” maoy tubag. “Imong silingan.”

Nahinumdom dayon ko. Husto, si Carter. Ang nagpuyo sa atbang nga balay. Usa siya ka biyudo. Sa akong nasayran, namatay ang iyang asawa sa usa ka aksidente. Siya nay nag-atiman sa usa nila ka anak.

“U-unsay ato?” Nangutana ko ni Carter.

Unang higayon nga nanawag siya nako sa telepono sukad kami nagkasilingan. Daklit ra sab kun kami magkasultihanay.

“Dapiton ko unta ikaw sa birthday sa akong anak,” ni Carter pa.

Wala nako balibari ang imbitasyon ni Carter. Maikog ko kay managsilingan gud mi. Maong midalikyat ko sa iyang gipuy-an nga atbang ra sab sa balay nga akong gipuy-an. -- Sumpayan pa