Misyon sa kasingkasing

Gula 88

“Ayaw na pagpakaaron-ingnon, Debra. Nabisto ko na ang imong baraha.”

Ug gisuginlan ni Bradley bahin sa iyang nasayran nga duha sila ka lalaki sa kinabuhi niini. Sa sinugdan, gipanghimakak kini ni Debra. Apan sa dihang gitug-anan na niya kini nga nakita niya sila nga nanggawas gikan sa usa ka hotel sa uptown area, wala na makatingog si Debra.

Nanglipaghong si Debra sa iyang atubangan tungod sa kauwaw. Ug wala kini manamilit kaniya nga mipauli.

Pagkasunod adlaw, nabalitaan na lang ni Bradley nga patay na si Debra. Naghikog kini ginamit ang blade nga gilaslas sa pulso.

Sa suicide note nga nautingkayan sa mga imbestigador, gidetalye ang hinungdan sa paghikog ni Debra. Mabdos diay kini. May kabilinggan sa kinabuhi ang lalaki nga maoy nakaingon sa kahimtang niini.

Nakapanglingo si Bradley sa iyang nasayran. Nareyalisar niya karon nga kun misanong pa siya sa pagpanghagad ni Debra nga magminyo na sila, himuon lang diay unta siyang Salvador del Mundo niini.

Pasayloon unta sa Dios ang iyang kalag! Nagkanayon si Bradley sa hilom.

TORIL, DAVAO CITY...

Diha si Sandra sa hardin sa lapad nga lagwerta sa ilang balay, nalingaw nga nagtan-aw sa mga alibangbang nga naniba sa nektar sa mga bulak, sa dihang mitingog ang buzzer sa gate nga puthaw. -- Sumpayan pa