Oras mo na, Rey Corpuz!

Gula 22

Human sa ilang pagtagay sa lawasnong kalipay, mibangon si Althea ug misulod sa banyo nga diha ra sab sulod sa kuwarto. Si Rey Corpuz nagpabiling naghigda sa kama, naghayang ug nagtutok sa kisame.

Paggawas ni Althea gikan sa banyo, mibangon si Rey ug nag-ilis. Nag-ilis na usab si Althea. Ug nanggawas sila sa lawak. Didto sila mopaingon sa hardin nga nindot kaayong sud-ongon tungod sa kadaghan sa mga bulak ug ubang mga misitas.

“Human sa pamahaw mobiya na ko dinhi,” pasidaan ni Rey ngadto kang Althea. “May importante kong gimbuhaton karong adlawa.”

“Ikaw ang mag-igo, Rey,” nagkanayon si Althea. “Salamat sa imong pagduaw nako.”

“Mianhi gyud ko kay tingalig nahiubos ka nga gibalibaran tikaw kagahapon.”

“Di mahitabong mahiubos ko. Nakasabot ko sa imong trabaho.”

Naputol ang panagsulti nila ni Rey ug Althea dihang miduol ang kosinera sa ilang nahimutangan, nagpahibalo kanila nga andam na ang lamesa alang sa pamahaw.

Nanulod sila sa balay. Giagbayan ni Rey si Althea. Midiretso sila sa komedor ug mitambong sa lamesa. Nangaon dayon sila.

Human sa pamahaw, mibiya dayon si Rey sa gipuy-an ni Althea. Midiretso siya sa kinapusoran nga makahatag niya’g lead kun unsaon niya paglit-ag ang lider sa Jehadda Sellamiah nga si Abaddon nga gikatahong nakasulod na sa Sugbu ug maoy responsable sa sunod-sunod nga pagpamomba, una sa Bouseit Hotel ug ikaduha sa Segundo Mall.

Usa ka higayon niana, nag-research si Rey Corpuz sa internet sulod sa iyang suite. Nangita siya’g dugang mga kasayoran mahitungod sa Jehaddah Sellamiah, partikular na ni Abaddon. Natultolan niya ang usa ka website nga nag-post og daghang kasayoran mahitungod kang Abaddon.

Samtang nagpadayon siya pag-search sa internet, mibagting ang iyang cellphone. Si Vonna ang nanawag. Gitubag dayon ni Rey ang tawag sa babaye. Nakugang si Rey dihang nabati niya ang hilak ni Vonna didto sa pikas tumoy sa linya. -- Sumpayan pa