Oras mo na, Rey Corpuz!

 Gula 13

Milungtad og dugay ang pagtagay nila ni Rey ug Althea sa lawasnong kalipay. Hangtod nga natagbaw sa hingpit ang ilang kahinam dihang nagkadungan sila’g sangko sa kinapungkayan sa himaya.

“Maldito ka gyud, da,” ni Althea human sa makutas nilang kombate.

“Nganong nakasulti ka man og ingon niana?” Nakasukit si Rey.

“Tungod kay bisan may samad kanang imong abaga, naka-score ka man lang gihapon.”

“Nagpasabot lang kana nga usa ka tough guy si Rey Corpuz.”

Unya gilain ni Althea ang tema sa ilang panagsulti.

“Dili ko mopauli ron sa balay,” ni Althea pa. “Ubanan ko ikaw dinhi.”

“Ikaw ang mag-igo,” ni Rey pa.

“Kun gusto ka, akoy mokuha’g nurse nga makaatiman nimo dinhi -- nga maoy mo-dressing sa imong samad. Aron ba dili ka na mahasol pag-adto sa hospital.”

“Ayaw na lang. Makahasol na ko pag-ayo nimo. Gawas pa, okey ra man sab para nako kun moadto ko kanunay sa tambalanan. Magpahatod lang ko’g taxi kay dili pa man ko makahimo pag-drive.”

Tibuok adlaw nga nakig-uban si Althea kang Rey sulod sa iyang suite sa hotel. Gabii nang mibiya si Althea sa UCV Hotel and Casino.

Pagkaugma, mibalik si Rey Corpuz sa tambalanan aron madresingan ang iyang samad. Mahimo ra gud unta nga ang nurse lang ang mopahigayon sa dressing sa iyang samad. Apan gipangunayan gayod ni Doktora Vonna Lazaro ang pag-dressing sa samad ni Rey.

 Namatikdan ni Rey nga ingon sa gaan kaayo’g buot si Dra. Lazaro kaniya. Gihatagan gayod siya’g special treatment niini kay sa ubang mga pasyente nga giatiman niini.

“Kinsa man tong babaye nga nitanod nimo?” Nangutana si Dra. Lazaro samtang naghunad kini sa iyang samad.

“Ang hain ba niadto?” Nagpagoryo-goryo si Rey.

“Kadto gong kalit lang misulod nga nagdalag mga pagkaon samtang nag-estorya ta sulod sa imong ward.”

“A...si Althea. Ako tong ig-agaw.” Namakak si Rey.

“Mora’g pamilyar lagi nako ang iyang panagway,” ni Dra. Lazaro pa.

“U-unsa?” Nakaingon si Rey. -- Sumpayan pa