Oras mo na, Rey Corpuz!

Unya, dihay milanog nga sipang mga buto-buto. Nahalingi-lingi si Rey Corpuz. Nakita niya nga may gikasangka ang kapolisan. Mga tawo nga pulos nagsul-ob og turban sa ilang mga ulo.

Nagtuo si Rey Corpuz nga ang gikapinusilay sa kapolisan mga terorista nga mi-back-up sa suicide bomber nga nagsakay sa ayroplano nga mibangga sa Bouseit Hotel.

Dihadiha mikanaog si Rey sa sakyanan nga giluwanan nila ni Althea. Dili mahimong magtan-aw lang siya sa mga tinugyanan sa balaod nga nakigsangka sa mga terorista.

“A-asa ka, Rey?” Nangutana si Althea dihang nahikanaog na si Rey.

“Dinhi ka lang,” giingnan ni Rey ang babaye. “Ayaw gyud paggawas sa sakyanan bisan magkinaunsa man.”

Dihadiha mibiya si Rey sa nahimutangan ni Althea.

Mitabang siya sa pagpakigsangka sa kapolisan sa mga tawo nga nagsul-ob og turban. Abtik kaayo siyang miayuda sa mga tinugyanan sa balaod.

Bang! Bang! Bang! Brat-tat-tat-tat-tat! Bzing! Pow!

Mora’g gisangag ang palibot sa sipa kaayong mga buto-buto sa kamatayon. Matag karon ug unya mosapaw sa mga buto sa mga armas nga tag-as og kalibre ang tig-ik sa kasakit ug agulo sa kamatayon.

Nagpadayon ang pinusilay tali sa mga tinugyanan sa balaod ug sa mga tawong nagsul-ob og turban. Si Rey nakaluthang nag duha ka tawong nagsul-ob og turban. Ug nagpadayon pa siya sa pag-ayuda sa kapolisan sa pagpakigpinusilay sa mga kaaway.

Dihang mitang-on ang mga buto-buto, pito gayod ka tawo nga nagsul-ob og turban ang mihay-ad ug mihagsa sa yuta nga wala nay mga kinabuhi.

Usa sa napatay gihiling ni Rey. Iyang nasuta nga Pinoy ang tawo nga nagsul-ob og turban nga iyang napatay.

“Buhii kanang gigunitan mong armas!”

Naigking si Rey dihang nadungog niya ang tingog gikan sa iyang luyo. Mihinay siya’g lingi. Maoy iyang nakita ang mga polis nga nagbarog sa iyang luyo ug ang ilang mga armas gitumong kaniya.

Dihadiha gibuhian ni Rey ang iyang armas. Gipataas niya ang iyang mga kamot. Giduol dayon siya sa duha ka polis ug gigunitan sa pagbinaklid ang duha niya ka kamot. -- Sumpayan pa