Oras mo na, Rey Corpuz!

Si Althea maoy nangunay pagmaneho sa luho niyang sakyanan. Maoy ilang girumbo ang usa ka sikat nga mall sa dakbayan sa Sugbu.

Pag-abot nila sa usa ka intersection diin malantaw na ang mall nga maoy ilang adtoan, napugos paghunong si Althea dihang misiga ang pulang suga sa trapiko alang sa mga sakyanan.

Ang mga mata ni Rey wala mahimutang samtang sila nagpaabot sa pagsiga sa green light. Gipaliraw niya ang iyang panan-aw sa palibot.

“Dali ra kaayong nahuman pagtukod kanang bildinga, no?” Gitudlo ni Rey ang hotel nga nahimutang sa atbang nga bahin sa eskina.

“Tinuod kana,” matud ni Althea nga ang mga mata didto girumbo sa nagsiga pang red light. “Ang Bouseit Hotel kana. Gipaspasan gyud ang pagtukod niana kay usa kana sa puy-an sa mga delegado nga motambong sa ASTO Summit nga ipahigayon dinhi sa Sugbu.”

“Mao ba?”

“Mao kana. Sikat na gyud kaayo ang Sugbu.”

“Walay molalis niana. Tulin sab kaayong milambo ning siyudara.”

“Mosamot pa gyud unya ang paglambo ning siyudara kun mahurot nag kahalin ang mga luna sa South Road Properties.”

“Bitaw. Ug may dugang na unyang oportunidad sa panarbaho ang atong kaigsuonang Sugbuanon.”

May isulti pa unta si Althea apan nakabig ang pagtagad niini sa usa ka private plane nga nagpamabaw sa paglupad. Igo lang gyud kining nagpaibabaw og diyotay sa rooftop sa Bouseit Hotel. Ingon sa mituyo gayod pagsapigad sa hotel ang maong ayroplano dayong lupad palayo.

Ginuntan sab ni Rey sa pagtan-aw ang nagkalayo nga ayroplano hangtod nga nawala na kini sa iyang panan-aw.

Apan kalit lang mibalik ang ayroplano. Maoy girumbo niini ang Bouseit Hotel. Ug daw nakalitan ang tanan diyang mibangga ang maong private plane ngadto sa bag-ohay pa lang nahuman pagtukod nga hotel. Miulbo ang ayroplano human mabangga sa hotel.

Ug nahugno ang hotel. Dihadiha nagdinaganay ang mga tawo. Nahitabo ang traffic jam. Nagkaguliyang ang palibot. Ingon sa mihakop ang kalisang sa nahasiril-siril sa palibot. -- Sumpayan pa