May utlanan ang kangitngit

Gula 13

Kay dili man ko makahigayon sa pagpakigsulti ni Reuben sa personal, mi-text na lang ko niya aron akong masayran kun unsay gipanagsultihan nila ni Papa Amado. Mireply dayon si Reuben sa akong text. Gipahibalo ko niya nga nanghipos na siya sa iyang mga gamit kay gihinginlan na siya sa akong amahan.

Nakugang ko sa kasayoran nga gitug-an ni Reuben kanako. Mitext kog usab ni Reuben aron akong masayran kun nganong kalit man kaayo ang desisyon ni Papa Amado sa pagpapahawa kaniya gikan sa among pinuy-anan. Akong nasayran nga gusto diay ni Papa Amado nga magkalagyo kami si Reuben. Nagduda na diay usab si Papa nga may relasyon kami si Reuben. Nasubo ko sa maong kasayoran. Apan unsay akong mahimo? Dili mahimong pugngan ko si Papa Amado sa iyang paghingilin ni Reuben. Tingalig moulbo hinuon ang dakong kagubot kun buhaton ko kini.

Niana dayong pagkagabii mibiya si Reuben sa among balay. Segun sa iyang text nako, adto siya mobalhin og puyo sa boarding house sa iyang classmate. Sukad sa pagbiya ni Reuben sa amo, wala gyud ko makighisgot sa akong mga ginikanan mahitungod kaniya. Wala ko magpakitag kahingawa ug pagpakabana alang kang Reuben aron magtuo gayod sila si Papa ug Mama nga wala kami relasyon ni Reuben.

Sa pagbiya ni Reuben sa balay, kanunay na kaming magkita sa gawas. Sagad adto kami mag-abot sa usa ka fastfood outlet sa Colon area. Usahay adto mi sa Robinsons mag-abot. Kinawat-kawat ang among panagkita. Nagbantay gyud mig maayo nga dili mi masakpan nila ni Papa ug Mama. Seguradong masuko gayod sila kun masayod sa among gibuhat. Sakit ra ba kaayog sinultihan si Papa Amado kun masuko.

Usa ka higayon niana, mitext si Reuben nako nga magkita mi sa usa ka inilang kan-anan sa downtown area. Gipakigkitaan ko siya human sa akong klase.

“Manan-aw ta ron og sine,” gihagad ko ni Reuben.

“Dili ko,” mibalibad ko. “Tingalig magabhian tag pauli. Masuko unya sila si Papa ug Mama nako.”

“Pangita lang god og alibi,” ni Reuben pa. -- Sumpayan pa