Boiz, Babes and Kids Champions in Concert

Malampuson ang gipahigayong concert sa grupo sa mga dancers ug mga singers nga mga Talisaynong batan-on niadtong Sabado sa gabii diha sa Tabunok Sports Complex.

Sa maong adlaw mao usab ang paglusad sa grupo sa Freshest Kids nga gilangkuban nila ni Leona Mae Batuto, Mitsuko Cabillada, Edilyn Kaye Aguilar, Ana Preciosa Bacalso ug Jessa Mae Abaquita.

Ang maong kalihukan gipasiugdahan sa grupo sa Freshest Boiz ug Babes diin giayudahan usab sila sa komitiba sa Tourism Cultural Historical Affair nga gipangulohan ni Konsehal Shirley Belleza.

Ang maong concert giulohan og "Champion in Concert" usa ka concert for a cause kinsa ang mga Special Children sa Tabunok Central School ang nakabinipisyo niini.

Ang Freshest Boiz ug Babes ang miduol ni Belleza aron mangayo og ayuda nga makapahigayon sila og concert diin usa kini ka pasalamat sa ilang grupo sa ilang naabot karon nga kalamposan ug wala sila masusama sa mga Special Children nga dunay mga deperensiya sa panglawas.

Ang mga Special Children maoy mipahigayon sa invocation para pagsugod sa programa.

Ang mga teen idols nga gilangkuban sa mga banggiitan na kaayong mag-aawit nga mga Talisaynon ang mipahigayon og show down sa kanta diin miapil usab nila ang mga talented nga Special Children.

Ang grupo sa mga dancers nga Boys Unlimited, Freshest Boiz, Babes ug Wave Onyx ang mipahigayon usab og showdown sa sayaw ug kanta.

Ang Bisrock ug Pink Crew nga mga guest sa maong concert ang mihataw usab.

Sila si Mitsuko, Edilyn ug Leona kinsa mga Talisaynong mga bata ang mga walay titulo apan mahiligon sa pag-awit ug sayaw apan swerte tungod kay napili kini sa gipahigayong audition para mamugna ang grupo sa Freshest Kids ang mihataw usab.

Tumong sa grupo nga maaghat ang ubang mga batan-on nga mopakita usab sa ilang talento ug mopahilayo sa mga dili maayong bisyo.

Ang sports complex sa Tabunok napuno sa mga nanan-aw sa concert ug silang tanan nalingaw ug midayeg sa maong pasundayag ug gani ang grupo adunay umaabot na usab nga imbitasyon.