'Rated R' sa Indephums ilusad na

Lami kaayong ikanta og "ani-a, ani-a na gayud ang dugay nang gipaabot!" kay karong Sabado, Nobiyembre 11, puhon ilusad na sa Indephums ang ilang gihaguan nga "Rated R" album. Puhunan niini mao ang singot, dugo, sip-on, laway, luha, ug uban pa dihang likido nga moagay sa kalawasan timaan sa pagdegamo ug mga paningkamot makakulit og pangalan sa natad sa pagpanukar.

Tulin gyud nga nangligid ang mga adlaw kay pilahay ra gud to'ng akong gibuhat nga pakighinabi sa pundok Marso ning tuiga sa dihang bag-o pa silang natukod isip Indephums (Independent Humans). Karon matawag na sila nga usa ka bankable Bisrock band dinhi sa Sugbu, usa sa labing gipangga, gihangop, gipakpakan ug gisabayan ang ilang mga orihinal nga kompo.

Ang Rated R kinutlo gikan sa unang letra sa mga pangalan sa mga sakop niini - silang Raymond "Ray/Mondoy" Arsenal (vox), Renan Cuizon (gitarista), Ryan Cuizon (tambolista) ug Ronan de Guzman (bahista), puros mga taga Pardo.

Human sa pagpagawas nila'g Extended Play album sayong bahin ning tuiga, niabot ra gyud ang panahon nga ilang ilusad ang compilation sa ilang mga kanta - Negatibo, Limitasyon (Maayo Kang Sunogon), Angay Na Ba?, Insakto, Hukom (Suya), Hulmigas, Buak (Candy), Plastik, ug ang makabungog nga anthem sa Bisaya rock, ang "Bisrock (With DJ Ram and Bré) nga mo-segue gilayon ngadto sa pagka-reggae ang paningog, dayong hirit sa linyang "ni-come up mi'g reggae music. Ngano man?". Sample sa ilang upat ka mga kanta ma-stream ninyo sa www.myspace.com/indephums.

Hugop gyud tang mga big, big fans karong Sabado sa Handuraw Events Café. Tag P80 ang entrance fee. Usab, aduna'y ipang-apud apud nga mga premium items (10 t-shirts ug 10 tumblers) ang The FREEMAN-Banat News alang sa mga pipila ka mga lucky concert-goers ana mismong gabhiona isip pagpaluyo sa maong album launching.

Ayaw usab saypa karong gabii ang mahitabong Rockerzdak Nite diha sa La Mer Café, Mango Square Mall nga gihugopan na og sugod sa mga mahiligon sa Bisaya rock. Manukar ang Abscond, KDB, Republika, Fungus, 3ChordsChoir, Wet Slipperz ug Birth Control karong 9pm. Ang pulta tag-P50.