Cesar dunay laing Hollywood movie

Dunay umaabot nga telesine si Cesar Montana sa GMA-7 nga ipasalida karong Holy Saturday nga dunay titulo nga " Milagroso" busa ang teaser niini karon nagkanayon nga "balik syete" na ang nahisgutang multi-awarded aktor.

Apan ang manager ni Cesar nga si Norman Japitana sa PangMasa mikatawa lang og mipasabot nga dili gyud matawag nga "balik syete" gyud ang aktor sanglit hagbay naman kini nga walay kontrata ubos sa ABS-CBN.

"Hindi naman talaga balik-siyete si Cesar dahil two years na rin siyang walang contract sa Channel 2. Free siyang mag-guest kahit saan ngayon dahil wala nga siyang contract kahit kanino," pong pa ni Japitana. Gani niadtong nakalabay nga semana guest man si Cesar sa taping sa "Quizon Avenue," ug dihang gitanyag ngadto nila sa GMA-7 ang "Milagroso," ila kining gidawat tungod kay giganahan sila sa project.

Gitin-aw ni Japitana nga dili makapatuyang og dawat og projects si Cesar sanglit kanunay kining wala dinhi sa nasud, gani dunay offer ang ABS-CBN last year nga usa ka soap apan ilang gibalibaran tungod kay wala sila makasiguro kon ila ba kining mahuman.

Gipahibawo usab ni Japitana nga dunay laing pelikula nga himoon si Cesar sa Hollywood apan mas gamay kini kon itandi sa "The Great Raid," diin malaumon sila nga mahuman na ang negosasyon ug masugdan na ang shooting.

Matud ni Japitana nga bisan og dunay movie offer si Cesar dinhi sa nasud ila usab kini nga gibalibaran tungod kay basin ipatawag si Cesar sa Hollywood bisan unsang orasa. Maui hambugera

Daghan ang gihambugan kang Maui Taylor human niya ipasigarbo nga daghan ang nangulitawo niya nga showbiz ug non-showbiz personality after sila nagbuwag ni Bryan Revilla.

Kini tungod kay matud pa sa mga nahinabi sa PangMasa, bag-o pa gani nga naghilak-hilak si Maui sa television interviews ug kalit lang gipahibawo niini nga daghan na usab ang nanguyab niya.

Suma pa sa mga himantayon nga posibling defense mechanism lang kining tanan aron ingnon nga naka-move-on na siya apan ang tinood gisakitan ug dili pa gyud madawat ni Maui ang kamatuoran nga natapos na ang tanan tali nila ni Bryan. Katrina "walay grado"

Nahisama og walay grado si Katrina Halili tungod sa iyang gipakita nga kamaldita sa "Extra Challenge" last week diin ginawong niini og kasaba si Jacque Estevez.

Tungod niini usa ka fan niya ang wala gyud kapugong ug nagpadala og suwat ngadto sa PangMasa aron ipalanog nga wala gyud sila makauyon sa gipakita sa ilang idolo nga si Katrina.

Ang sender nga ginganlan og Myrna Ballesteros miingon nga bisan og nanobra na ang pagka-sensitive ni Jacque, nanobra na ang pagkabastos ni Katrina diin wala gani gyud niya pasultiha ang nahisgutan nga Sexbomb dancer kinsa niadtong panahona perteng hilak.

Miingon ang sender nga mura na hinoon og walay grado si Katrina tungod sa iyang gibuhat diin " nagmukha siyang palengkera" gawas pa nga hambugera kaayo tan-awon.

Apan ang tubag sa PangMasa mao nga angayan nga paaboton una ang habig ni Katrina tungod kay posibling apil sa challenge ang gipabuhat ngadto sa nahisgutan nga Starstruck avenger.