Sharon labing gamhanan nga artista

Bugtong si megastar Sharon Cuneta lang ang artista nga nalakip sa 100 Most Powerful and Influential Pinoy" nga gipaguwa sa BizNewsAsia ning bag-o lang.

Lakip sa mga dagkong personalidad nga nalakip mao sila si Presidente Gloria Arroyo nga maoy nag-una sa listahan, si Kanhi Presidente Joseph Estrada, Manny Pangilinan (PLDT/Smart), Danding Cojuangco (SMB), Henry Sy (SM), John Gokongwei (Robinson's/JG Summit) ug Lucio Tan (PAL/PNB/Fortune Tobacco).

Gipasabot sa journalist nga si Tony Lopez nga ang sumbanan sa ilang magazine sa pagpili sa 100 ka mga gamhanan ug dunay mga impluwensya nga Pinoy mao ang kaayohan nga nahimo sa maong mga personalidad sa ilang kompaniya, panginabuhi ug sa kalambuan sa nasud.

Miingon si Lopez nga bisan ug giuwan og mga kontrobersya si Arroyo dili ikalimod nga ang naulahi pa gihapon ang labing gamhanan nga nilalang sa Pilipinas hangtud karon.

Samtang matud niya nga bisan og napalagpot sa pangagamhanan si Erap dayag usab nga nagpabilin gihapon ang naulahi nga dunay liderato ngadto sa mga politiko ug padayong gitamod sa kinabag-ang duot sa masa.

Si Sharon sa laing bahin dugang pa ni Lopez nga nagpabiling labing bug-at ug lig-on nga product endorser sa nasud diin tanang produkto nga giduso niini gidugok gyud sa mga pumapalit.

Matud pa nga dili usab ikalimod nga dako ang natabang ang kasikat ni Sharon sa pagkapili sa iyang bana nga si Kiko Pangilinan isip senador.

* * *

Dunay himoon nga pelikula ubos sa Viva Films sila si Ruffa Mae Quinto ug Ai-ai delas Alas ug karon pa lang giklaro sa nauna nga wala siyay problema kon ang billing na unya ang hisgutan.

Gikalipay ni Ruffa Mae ang maong umaabot nga pelikula tungod kay taud-taud na usab nga wala niya makauban ang comedy queen diin ang last movie nila together mao ang "Booba" pipila na katuig ang nakalabay.

Matud niya nga bisan pa og mag-una ang ngalan ni Ai-ai ug siya mangiwit walay issue alang niya sanglit ang importante mao nga ang nahisgutan unya nga lilas ubos sa direksyon ni Bb. Joyce Bernal isalmot sa nagkadaiyang film festivals sa gawas sa nasud.

* * *

Samtang dili mutuo si Brad Turvey sa tsika nga uyab na si Pops Fernandez ug Jomari Yllana sanglit matud sa Fil-Australian model wala gyud mohisgot ang concert queen kalabot niini ngadto kaniya.

Matud ni Brad nga nagpabiling managhigala sila ni Pops bisan og nagbuwag na sila ug bisan pa og wala na sila magkita padayon gihapon silang dunay kumunikasyon sa cellphone.

Sa samang higayon giklaro ni Brad nga nag-iring-iring siya kang Iza Calzado kaniadto apan matud pa niya nga ang tanan nisampot lang sa panaghigalaay.

Bag-o pa lang nipirma og laing two-year contract si Brad ubos sa GMA Artist Center diin iyang gitin-aw nga kontento ra siya sa dagan sa iyang career bisan og Nuts Entertainment lang ang iyang regular show gumikan kay kanunay man siyang-guest sa nagkadaiyang shows sa estasyon.