Housemates gibali-bali og pangutana

Hugyaw kaayo ang gipahigayong presscon kauban ang trese ka Pinoy Big Brother Housemates niadtong Sabado sa udto diha sa Teatro Casino sa Waterftront Hotel, Lahug diin gibatikos sila og pangutana sa mga sakop sa press.

Usa sa pangutana sa maong presscon mao ang deportation nila ni Sam Milby nga usa ka American Citizen ug Uma Khouny nga usa ka Israeli.

Gitataw ni Uma ug Sam nga gihikay na nila ang ilang mga dokumento alang sa ilang dual citizenship og wala na kini problem diin pwede na silang magpadayon sa ilang trabaho dinhi sa nasud.

Kahinumduman nga si Uma mibuhi og sulti nga dili siya ganahan og probensiyana dihang gipangutana siya kabahin sa usa ka housemate nga si Raquel

Daghang wala ganahi sa gisulti ni Uma apan kagahapon nakahigayon kini og depensa sa iyang kaugalingon.

Gitataw ni Uma nga ang iyang inahan usa ka probesinyana diin ang kagikan niini taga Leyte apan nagpuyo na kini karon diha sa Banawa niining dakbayan.

Matud pa ni Uma nga okay ang ilang relasyon ni Raquel dungan sa pagtin-aw nga nasulti niya kadto nga dili siya ganahan og probensiyana tungod kay wala silay ma-share sa usag-usa sanglit nagtubo siya sa dakbayan samtang si Raquel usa ka promdi.

Ang gitawag nga "Love Bird" sa Bahay ni Kuya nga sila si Say ug JB Magsaysay wala usab makaikyas sa mga pangutana kabahin kung unsa nay nahitabo sa ilang relasyon karon.

Gitataw sa duha nga wala nay silay relasyon og matud ni Say nga nagpabilin gihapon silang higala ni JB bisan ug dili na sila uyab.

Nahugyaw usab ang mga cast sa PBB sa ilang pagbisita dinhi sa Sugbo tungod sa mainitong paghangop kanila sa mga Sugboanon.