Cebuana singer finalist sa 'The Next Big Thing'

Si Kristine Gonzales Demetrio usa ka Cebuana singer gikan sa Banawa ang gilauman nga maoy mahimong sunod nga "Diva".

Wala magdahom ang 24 anyos ug degree holder sa University of San Carlos (USC) Talamban Campos sa kursong Fine Arts major in Advertising Arts nga masulod siya sa "Magic 5" sa The Next Big Thing" talent search.

Ang McDonald's maoy organizer sa nahisgutang bangga ug dunay collaboration sa MTV Asia and Philippines ug sa Vicor Music Corporation.

Ang mananaog sa maong bangga makadawat og P250 mil nga ganti, ug singing contract sa Vicor.

Ug labaw sa tanan ang mananaog maka-earn usab ug usa ka live Dream Concert performance uban sa mga bag-ong hot recording artist diin ang MTV maoy mo produce niini.

Sukad pa sa iyang pagkabata mahigugmaon na siya sa pagkanta apan usa lang ka higayon nga nakaapil og singing contest sa iyang tunghaan sa high school pa siya sa Cebu Normal University matud pa ni Kristine.

Ug kung dunay mga salo-salo sa ilang balay siya maoy pakantahon sa iyang mommy para ma-entertain ang ilang mga bisita.

Hapit nang mi give-up siya sa pag-apil sa maong bangga tungod sa iyang ubo diin naka-irritate sa iyang tutonlan.

Apan usa ka suod niyang higala ang mi-encourage kaniya nga mopadayon.

Niadtong Hulyo 15 niining tuiga sa alas 10:00 sa gabii misumiti si Kristine sa iyang entry diha sa McDonald's Jones Fuente.

Ang duha ka kanta nga gisumiti ni Kristine sa iyang entry mao ang "Emotions" sa Destiny's Child ug "Weak" sa Sisters with Voices (SWV) diin gi-record niya kini didto lang sulod sa iyang kwarto tungod kay wala nay mga recording studio ang nangabli adtong higayona.

Ug pagka petsa 2 niining buwana nakadawat siya ug balita nga usa siya sa five finalists.

Si Kristine usa ka kanhi vocalist sa "In Him Band" diin kanunay nga mopasundayag diha sa Camp Z (Zitro) sa Banilad dakbayan sa Mandaue.

Kagahapon ang naulahi miadto sa kaulohan kuyog sa laing mga finalist.