Kaabog ba?

Nangreklamo ang mga pumapalit ug ang mga naninda sa merkado sa Carbon kay pwerteng aboga gikan sa ibabaw sa gitrabaho nga building diha sa may kanhi Warwick Barracks.

Si Maria Pino, ang pangulo sa mga tindera sa Carbon, mi-upload sa social media sa talan-awon nga makita kaniadtong Huwebes sa gabii nga pwerteng aboga gyud gikan sa ibabaw sa gitukod nga building.

Kamo sa Megawide, badlonga na ang inyong kontraktor og unsa nay ilang gihimo diha sa ibabaw. Daghan man nga ongoing construction apan dili man sama niana nga makamugna og grabeng abog.

Gawas nga makahatag kini og kadaot sa panglawas sa mga tawo, apil ang mga pumapalit, ang inyong mga trabahador dili na “Safe” tungod niadtong hilabihan ka baga nga abog.

Unta, dunay mga opisyal sa siyudad nga magpakabana niining maong isyu. Dili maayong magpadayon kini.

* * *

Garbo sa mga Sugboanon nga si kanhi Supreme Court Chief Justice Hilario Davide apil sa pangayoan og legal advice sa mga Senator-Judges kon pila gyud ang threshold nga botos nga makapakonbikto ni Vice President Sara Duterte.

Kabahin siya sa Amici Curiae, kun Friends of the Court, nga pangayoan sa iyang hunahuna kay ang Senado sa pagka karon dili na kompletong 24 ka sakop nga makatambong atol sa pagbotar kon angay ba nga konbiktohon si VP Duterte.

Pipila ka buwan ang nakalabay, si Davide nga apil sa mga sakop sa Constitutional Commission nga migama sa 1987 Konstitusyon, miingon nga 16 gyud ka botos ang makapakonbikto ni Sara.

Kini tungod kay ang 1987 Constitution nag-ingon man nga ang kinahanglang mobotar aron makonbikto ang impeachable officer, "2/3 of all the members of the Senate." Wa man mag-ingon ang Konstitusyon nga ang mobotar 2/3 sa tanang senador nga motambong sa botasyon.

Apan gitan-aw sa uban nga kon ang 16 gyud ang tumanon nga threshold, unya 20 na lang ka senador ang makabotar kay nangapriso man ang ubang senador ug ang usa mitago, lisud nga makonbikto si Duterte.

Karong Septiyembre 16, ang Senado nga nagsilbing Impeachment Court, maminaw sa mga argumento sa ilang gidapit nga Amici Curiae aron mahatagan sila og ideya kon hukman na nila ang kaso sa bise presidente unya sa Septiyembre 23.

Si Duterte gipasakaan og upat ka Articles of Impeachment, usa niini ang paghulga niya sa presidente, sa unang ginang ug ni kanhi House Speaker Martin Romualdez, ug ang matud pa pagwaldas sa P650 million nga intelligence ug confidential funds.