EDITORYAL — Kinsa may alkanse?

Unsa gyud diay kadako ang mawala sa Pilipinas kung magpadayun kaning magmagahi ug mosupak sa China nga gustong ilugon ang West Philippine Sea niini?

Naay pipila ka business sector o business chamber of commerce nga nipagawas og statement nga daw nagbahad nga malup-og ug mabiyaan sa mga silingang nasud ang Pilipinas kun magpadayun kini sa pagtubagtubag sa China.

Gusto sa grupo nga dili maguba ang bilateral relations sa duha ka nasud ug magpadayun ang economic ties sa duha nga di kinahanglang isakripisyo ang soberniya sa nasud.

Unsa man diay ning gibuhat sa gobiyerno karun? Dili ba diay na maoy gibuhat nato karun?

Unsa may natampo nilang solusyon sa problema karun sa nasud batok aning pagsige og harass sa mga Chinese sa atong mga mananagat, unsa may ilang gibuhat sa dihang gibombahan og tubig sa China ang atong mga barko?

Kaning mga negosyanteha pagkatinuod sila ra ang nabulahan og maayo. Moabot og 35 bilyones dolyares ang gi-import nila nga mga produkto gikan sa China.

Pero ang China niabot lang og 9 bilyones dolyares lang sa atong mga produkto ang ilang gi-import gikan sa Pilipinas. Kadako sa deperensiya, so kinsa may alkanse kaha?

Dili man ang Pilipinas maoy nagsinamok sa WPS, wa man ta nangilog ug legal man ang atong posisyon dihang lugara, samtang ang China walay bisan unsang legal nga katungod ug gigamit ra nila ilang gidak-on ug kusog.

Pero nganong kaning mga negosyantiha gusto man hinuong sampungan ang atong baba, gusto nilang gapuson ang mga kamot sa atong Philippine Coastguard ug kulban og kaldero ang atong mga mananagat kay sa China man hinuon nilaban.

Kung tinuoray silang nagmahal  ug nagtan-aw sa ekonomiya sa nasud, imbes pahilumon ang atong gobiyerno ug pasagdan ang China sa ilang pagpanglupig, molihok nalang unta sila pag diversify sa sources sa mga produktong ilang baligya dinhi ug dili magsalig sa supply gikan sa China.

Hain man ang dungog anang ilang gibuhat karon?