Ajido, polo sabak sa aksyon sa YOG

DAKAR — Sasalang sa aksyon sina swimmer Jamesray Mishael Ajido at wushu artist Angel Polo sa pagbubukas ng fourth edition ng Youth Olympic Games (YOG).

Lalangoy si Ajido sa ikatlo sa apat na heats para sa men’s 100 meters butterfly ngayong alas-6:54 ng gabi (Manila time) sa Complexe Tour del’Ceuf pool.

Sasabak naman si Polo para sa final 8 seat laban sa 10 karibal sa preliminary round ng women’s Taijishian sa Diamniadio Expo Centre simula sa alas-6:12 ng gabi (Manila time).

 “I hope to do my best here, because these are the YOG and it’s already a once-in-a-lifetime opportunity to be here,” sabi ng 17-anyos na si Ajido, isang 11th grader sa Homeschool Global. “I trained very hard for months for this.”

Si Ajido ay isang silver medalist sa 2024 Southeast Asian age-group championships at isang Palarong Pambansa record holder.

Wagi naman si Polo, ipagdiriwang ang kanyang ika-16 sa Disyembre 21, ng bronze sa 10th World junior championships sa Tanjin, China noong Marso.

“Very very happy,” wika ng 10th grader sa Pasay North City High School.

Muling sasalang si Polo bukas sa women’s Taijiquann preliminaries, habang lalangoy si Riannah Chantelle Coleman sa women’s 200 meters breaststroke heats.

Nakatakda ang wushu finals bukas.

“We know that our young athletes have prepared themselves for these YOG and we’re hoping for the best results,” ani Philippine Olympic Committee president Abraham Tolentino kasama sina secretary-general Atty. Wharton Chan at chef de mission Rocky Samson.