CCMC dili pa luwas gamiton base sa resulta sa pagtuon

CEBU, Philippines — Dili pa luwas gamiton ang Cebu City Medical Center base sa resulta sa teknikal nga pagtuon sa mga boluntaryo nga nitan-aw sa electrical ug structural integrity sa tambalanan nga natanggong ang rehabilitasyon sobra na sa usa ka dekada.

Atol sa executive session kagahapon, Septiyembre 29, 2026 nakita nga posible nga dili pa matapos karong tuiga ang CCMC human gipadayag sa mga eksperto ang taas nga listahan sa substandard nga instolasyon sa proyekto.

“If I may say honestly, it's very unsafe as of now. It's very unsafe in terms of electrical hazards, in terms of power liability, and I think there are already manifestations, as I've said, there are already reported equipment malfunctioning starting last year”, butyag ni Engineer Brian Pasilan, officer sa Institute of Integrated Electrical Engineers of the Philippines Inc. ug usa sa mga volunteer engineer.

Gawas sa obserbasyon ni Pasilan, niinit usab ang diskusyon human nasuta ni Konsehal Dave Tumulak nga wala motambong ang duha ka importanteng representante gikan sa Commission on Audit(COA) ug ang Department of Engineering and Public Works (DEPW) nga gilaoman unta nga motubag sa mga isyu kalambigitan sa gasto, teknikal nga mga kapakyasan ug pagpatuman sa proyekto.

Si Tumulak kinsa chairman sa Committee on Health ug Committee on Budget and Finance nagkanayon nga “fishy” ang ilang walng pagtunga tungod kay ang konseho mismo nagpatawag sa executive session aron madungog ang ilang mga habig kong nganong padayon nga nalangan ang paghuman sa tambalanan.

Ug tungod kay wala ang presensiya sa COA, wala makakuha ang mga konsehal og tubag gikan sa auditing agency kong husto ba ang paggamit sa binilyong pundo sa publiko nga gigasto sa proyekto.

Bisan pa sa kapin ?1.8 bilyon nga naggasto alang sa CCMC nagpabilin ang daghang kapakyasan sa proyekto.

Gawas sa COA, wala sab motunga ang representante gikan sa DEPW nga gilauman nga motan-aw ug mo-validate sa teknikal nga findings nga gipresentar sa volunteer engineers lakip ang ubang mga isyu nga nitungha atol sa nagkadaiyang hugna sa construction.

Apan matud ni Tumulak nga usa sa mga engineer sa departamento ang ni-resign samtang ang department head nga wala nganli ni Tumulak nipili nga motambong sa usa ka Bids and Awards Committee meeting imbes nga motunga sa konseho.

Si Pasilan ug Engineer Pericles Dakay ang nitambong sa session ug nipadayag sa iyang obserbasyon mahitungod sa CCMC.

Matud ni Pasilan nga kuwang ang grounding system, dili pa kompleto ang generator synchronization panels, misaligned nga bus duct installations, temporaryo pa ang emergency standby wiring ug ang mga biomedical equipment nagsugod na og malfunction tungod sa electrical hazards.

Ang mga kondisyon nagdala sa peligro sa sunog ug electric shock bisan pa og adunay pipila ka corrective measures nga nahimo na.

Samtang si Dakay nga nagrepresenta sa Dakay Construction niuyon sa mga kabalaka ni Pasilan ug niangkon nga naapektuhan ang Phase V sa mga depektosong trabaho gikan sa nangaging contractor.

Matud ni Dakay nga daghang bahin sa CCMC ang kinahanglan ayohon o ilisan tungod sa substandard workmanship.

Lakip sa mga problema ang mga structural elements nga nakompromiso, electrical ug mechanical systems nga kinahanglan ilisan, plumbing ug piping nga wala mosunod sa specifications, finishing works nga napakyas sa quality checks ug mga elevator ug generator nga nanginahanglan og dinaliang pag-ayo.

Adunay mga bahin usab nga dili nila mahimong usbon o ayohon hangtud nga makakuha sila og pagtugot gikan sa COA.  BDB BANAT NEWS