Nuggets, Pacers nakatabla

CEBU, Philippines — Ang defending champion Denver Nuggets ug ang Indiana Pacers mipayaka og usab sa ilang mga karibal aron tablahaon ang tagsa-tagsa nila ka best-of-seven NBA conference semifinal series sa baraha nga 2-2 kagahapong adlawa.

Didto sa Target Center sa Minneapolis, si three-time MVP Nikola Jokic mibubo og 16 sa gipabuhagay niyang 35 puntos sa katapusang kuwarter sa dihang gipahilom sa Nuggets ang Minnesota Timberwoles, 115-107, sa ikaduhang sunod-sunod nga higayon sa ilang West semifinals.

Mihimo sab og kasikas si Aaron Gordon nga kausa lamang masipyat sa 12 niya ka itsa aron pagtapos og 27 puntos ingon man si Jamal Murray nga mitagak ig 12 sa iyang 19 puntos sa ikatulong kuwarter.

Hapsay na ang dagan sa Nuggets ngadto sa kadaogan sukad sila sila miposte og dakong 64-49 nga bentaha sa halftime.

Tungod sa balanse nilang opensiba, napuhalan sa Nuggets si Anthony Edwards nga mipabuhagay og 44 puntos alang sa Wolves.

Wala hinooy laing katumpang si Edwards.

Si Karl-Anthony Towns mihipos og 13 puntos apan wala maka-igo bisan og usa sa pito niya ka tira sa unang kuwarter.

Didto sa Indianapolis, ang Pacers mikagtigo sa Knicks, 121-89, aron tablahon sab ang ilang East semis ngadto sa tagurha ka duwa.

Si Tyrese Haliburton mipupo og 20 puntos samtang si T.J. McConnell midonar og 15 puntos alang sa Knicks nga sa unang kuwarter pa lamang  naglabaw na og 23 puntos.

Misamot pa ang kainit sa Pacers hinungdan nga sa usa ka higayon mi-abante sila og 43 puntos.

Si Jalen Bruson mihipos og 18 puntos, tulo ka rebounds, ug lima ka assists alang sa Knicks apan mipasud lamang og unom sa 17 niya ka itsa.