Quo warranto batok ahong gibasura
CEBU, Philippines – Hingpit nga gibasura sa Commission on Elections First Division ang gisang-at nga quo warranto petition sa duha ka Oponganon batok ni Lapu-Lapu City Mayor Junard “Ahong” Chan.
Sila si Cipriano Flores ug Luciano Dejito ang nisang-at sa petisyon nga gibasura tungod kay nilapas na ang 10 ka adlaw nga gitugot sa balaud sa pagduso niini.
Matud sa Comelec nga 44 na ka adlaw ang nilabay human giproklamar si Chan dihang gipasaka ang petisyon.
Ang desisyon giluwatan niadtong Disyembre 20, 2019 ug sa Enero 10, 2020 na kini nadawat ni Chan.
Ang petisyon nila ni Flores ug Dejito batok kang Chan ang naglambigit niadtong paggamit sa karaang porma sa Certificate of Candidacy (CoC) sa niaging eleksyon.
Gihangop ni Chan ang maong kalamboan ug niawhag sa tanan sa pagtinabangay alang sa gitinguha nilang kaayohan sa mga Oponganon nga ilang gipahinungdan sa serbisyo sa kagamhanan. /GMR (BANAT NEWS)
- Latest
