Multi-awarded media practitioner napalgang wala na’y kinabuhi

CEBU, Philippines — Patay na nga napalgan kagahapon sa buntag diha sulod sa iyang sakyanan nga iyang gi-parking diha sa annex building sa Inayawan Barangay Hall, Dakbayan sa Sugbo ang beteranong broadcaster ug multi-awarded media practitioner nga si Sam Costanilla, 68-anyos.

Matud ni Cebu City Councilor Dave Tumulak, chairman sa City Disaster Risk Reduction and Management Council nga wala pa’y nakita nga timailhan sa foul play sa unang pagsusi sa patay’ng lawas ni Costanilla.

Apan gihulat pa sa mga otoridad ang resulta sa autopsy aron matino ang hustong hinungdan sa iyang kamatayon.

 Gipagawas ni Tumulak ang closed circuit television (CCTV) footage gikan sa Barangay Inayawan Command Center nga nagpakita nga niabot ug ni-parking ang sakyanan ni Costanilla diha sa lugar alas 8:22 sa buntag niadtong Biyernes, Septiyembre 25, 2026.

 Napalgan ang iyang patay’ng lawas pasado alas 9:00 sa buntag kagahapon human gikataho nga namatikdan sa mga bata’ng nangagi sa lugar ang dili maayong baho nga gikan sa sakyanan.

Nakita usab nila si Costanilla nga wala naglihok sulod sa sakyanan nga naglingkod sa sa driver’s seat.

Si Monching Costanilla, manghud ni Sam nikompirma nga iyahang maguwang ang napalgang wala na’y kinabuhi sulod  sa iyang sakyanan.

Base sa taho sa Inayawnong Tigbalita, namatikdan usab sa mga barangay tanod nga nagpabilin nga naka-parking sa maong lugar ang sakyanan ni Costanilla sukad pa niadtong Biyernes. Gikumpirma sa management sa DYLA ang iyang kamatayon. Dugay na’ng miyembro sa broadcast team sa estasyon si Sam diin nagsilbi kining newscaster, news director ug program director sa DYLA 909 kHz.

Dugay usab nga bahin sa station identification sa DYLA ang iyang tingog.

Nailhan si Costanilla sa iyang kahibalo sa paggamit sa pinulongang Bisaya. Nakatrabaho usab kini sa DYCM-Cebu diin nahimong station manager, nagsilbi usab siya isip entertainment chief sa DOT TV Nationwide ug writer-director.

Gikataho nga nabalaka si DOT TV Nationwide chief executive officer Juniño Padilla gumikan kay wala motubag si sam sa iyang mga tawag ug text messages sukad niadtong Sabado.

Gipahayag usab ni Cebu Provincial Board Member Celestino “Tining” Martinez ang iyang dakong kasubo sa kalit nga kamatayon ni Costanilla nga iyang gihulagway isip usa ka dedikado nga broadcaster, matinud-anong propesyonal ug higala.

Matud ni Martinez nga dili malimtan ang daghang tuig nga gihatag ni Sam sa broadcasting ug pagserbisyo sa mga tawo lakip ang iyang pagkabuotan, kainit sa pakig-uban, malipayon nga personalidad ug pagtagad sa uban.

Si Martinez nipaabot og pahasubo sa pamilya, mga higala, kauban sa trabaho ug sa daghang tawo nga nahimong kabahin sa kinabuhi ni Sam. BDB BANAT NEWS