Tricycle sinalpok ng trak: 6 patay

MANILA, Philippines — Anim na katao ang nasawi kabilang ang tatlong menor de edad matapos na banggain ng trak ang kanilang sinasakyang tuk-tuk tri­cycle na kalaunan ay nasunog pa kahapon ng madaling araw sa highway na sakop ng Barangay Canda Ilaya, Lopez, Quezon.

Namatay agad sa pinangyarihan ng aksidente sina Cheska Brin Jucares, 28, may-asawa ng Sta. Cruz, Antipolo City; alyas Jasper, minor; alyas Jarid, minor; Riza Brin, 25 ng Brgy. Dela Paz, Antipolo, Rizal habang sa ospital naman nalagutan ng hininga sina Jaymar Orolfo Lunas; at alyas Julia, na isang minor.

Habang nilalapatan ng Luna’s sa Lopez District Hospital dahil sa mga tinamong sugat at pagkasunog ng iba’t ibang parte ng katawan sina Leopoldo Revilla Brin, 57, at isa pang minor na si alyas Janella.

Ayon kay PLt. Col. Dandy Aguilar, chief of police sa bayang ito, alas-2:10 ng madaling araw ay sakay ang mga biktima sa isang tricycle (Bajaj) tuk-tuk na minamaneho ni Julius Brin at binabagtas ang kahabaan ng Maharlika highway patungo sa direksyon ng Bicol Region nang banggain sila sa likuran ng sumusunod sa kanilang Fuso Truck na minamaneho ni Ernesto Alberto, 51 ng Hagonoy, Bulacan.

Sa lakas nang pagkakabangga ay tumilapon ng ilang metro ang tuk-tuk at tumama sa paparating na Yutong Bus na minamaneho ni Amor Pedragoza ng Antipolo City at kinalaunan ay nagliyab at nasunog na dagliang ikinamatay ng apat na biktima.

Mabilis namang naisugod sa ospital ang iba pang mga biktima na kinalaunan ay ikinamatay ng dalawa pa sa kanila.

Nakapiit na sa municipal jail ang tsuper ng trak at nahaharap sa patung-patong na reklamo.