Tensiyon nisamot tali sa depensa ug prosecution sa impeachment trial
CEBU, Philippines — Nisamot ang tensiyon sa ika-15 ka adlaw sa impeachment trial ni Bise Presidente Sara Duterte kagahapon diin naglalis ang depensa ug prosekusyon atol sa paghisgot sa mga dokumento ug testimoniya.
Base sa taho sa The Philippine Star nagbangga ang duha ka panig nga sila si private prosecutor Lorna Kapunan ug defense counsel Kristine Ferrer sa paggamit sa mga dokumento sa Office of the Vice President (OVP) lakip ang acknowledgment receipts ug liquidation records ug sa pamaagi sa cross-examination sa state auditor nga si Xylene del Campo.
Gipahimangnoan ni Senador ug Presiding Officer Chiz Escudero ang mga abogado nga dili tugotan nga mosamot ang tensiyon tungod sa gitawag niyang “seeming generational divide” tali sa duha ka panig.
Gihisgotan usab ang social media post ni private prosecutor Amando Virgil Ligutan kabahin sa misleading questions.
Matud ni Escudero, gimandoan na niya ang clerk of court nga subayon ang mga pampublikong pamahayag sa duha ka panig human namatikdan niya nga adunay usa ka panig nga kanunay na’ng “crossing the line.”
Sa cross-examination, gisusi sa depensa kong gikinahanglan ba ang pagdakop aron matawag nga malamposon ang operasyon nga gipundohan sa confidential funds.
Si Del Campo nagkanayon nga ang iyang interpretasyon nga gikinahanglan ang ebidensiya sa kalamposan nakabase sa iyang professional judgement ug sa 2015 joint circular.
Gihisgotan usab ang P132 milyones nga reward payments nga gi-flag sa Commission on Audit alang sa 2022 ug 2023.
Matud sa prosekusyon nga kulang ang mga report ug certification sa OVP isip pamatuod sa kalamposan sa maong mga operasyon.
Nahimong sentro usab sa hearing ang mga transcript sa 2024 house good government committee hearings nga gigamit sa COA isip basehan sa P375 milyones nga disallowance sa 2023 confidential funds.
Gipangutana ni Escudero si Del Campo kong ang actual nga transcript ba ang iyang gigamit sa pag-andam sa notice of disallowance.
Si Del Campo nipadayag nga ang iyang basehan mao ang iyang nadungog atol sa hearing ug dili ang transcript mismo.
Si Escudero nagkanayon nga mas klaro unta ang transcript ug posibleng adunay kuwang sa basehan sa maong disallowance. Samtang si Del Campo nagkanayon nga walay independente nga beripikasyon sa COA sa mga pamahayag nga gihimo atol sa house hearings. — (BANAT NEWS)
- Latest
